மூதாட்டி கொலை வழக்கு; மகனிடம் போலீசார் தீவிர விசாரணை

குருபரப்பள்ளி:

குருபரப்பள்ளி அருகே உள்ள நெடுமருதி கிராமத்தை சேர்ந்தவர் முனியப்பா. இவர் இறந்து விட்டார். இவரது மனைவி சூடம்மா (வயது 65). இவர் தனது மகன், மருமகளுடன் அந்த பகுதியில் வசித்து வந்தார். நேற்று முன்தினம் காலை சூடம்மா கழுத்தை நெரித்து கொலை செய்யப்பட்ட நிலையில் பிணமாக கிடந்தார். அவர் அணிந்திருந்த நகைகள் திருடப்பட்டு இருந்தன. இதுகுறித்து குருபரப்பள்ளி போலீசார் விசாரணை நடத்தினர். அதில் சூடம்மாவின் மகன் திம்மராசு, அவரிடம் நகைகளை கேட்டு தகராறு செய்தது தெரியவந்தது. இதையடுத்து திம்மராசுவை பிடித்து போலீசார் தீவிரமாக விசாரணை நடத்தி வருகிறார்கள்.