<
தோழியுடன் குடும்பம் நடத்திய பெண் மீது கிரிமினல் நடவடிக்கை எடுக்க உத்தரவிட முடியாது-மதுரை ஐகோர்ட்டு நிராகரிப்பு
தோழியுடன் குடும்பம் நடத்திய பெண் மீது கிரிமினல் நடவடிக்கை எடுக்க உத்தரவிட முடியாது என மதுரை ஐகோர்ட்டு நிராகரித்துவிட்டது.
மதுரை,
தோழியுடன் குடும்பம் நடத்திய பெண் மீது கிரிமினல் நடவடிக்கை எடுக்க உத்தரவிட முடியாது என மதுரை ஐகோர்ட்டு நிராகரித்துவிட்டது.
தோழியுடன் குடும்பம் நடத்திய பெண்
மதுரை பனங்காடியை சேர்ந்தவர் செல்வராணி. இவரது மகள் ஜெயஸ்ரீ (வயது 24). இவருக்கும் சரவணன் என்பவருக்கும் கடந்த சில ஆண்டுகளுக்கு முன்பு திருமணம் நடந்தது. 2019-ம் ஆண்டில் இவர்களுக்கு ஆண் குழந்தை பிறந்தது.
அதன்பின் சில மாதங்களிலேயே ஜெயஸ்ரீ வீட்டில் இருந்து மாயமானார். இதுகுறித்து செல்வராணி, அலங்காநல்லூர் போலீசில் புகார் செய்தார். பல மாதங்களாக அவரை கண்டுபிடிக்க முடியவில்லை.
இதையடுத்து அவரை கண்டுபிடித்து ஆஜர்படுத்த போலீசாருக்கு உத்தரவிட வேண்டும் என்று மதுரை ஐகோர்ட்டில், அவருடைய தாயார் செல்வராணி வழக்கு தொடர்ந்தார். அதன்பேரில் போலீசார் நடவடிக்கை எடுக்க ஐகோர்ட்டு உத்தரவிட்டது.
இதையடுத்து அவரை போலீசார் பல்வேறு இடங்களில் தேடினர். பின்னர் அவர் சென்னையில் இருப்பதை போலீசார் உறுதிப்படுத்தினர். அங்கு சென்று விசாரித்த போது, அவர் தனது பள்ளித்தோழி துர்காதேவியுடன் வாடகை வீட்டில் கணவன்-மனைவியாக வாழ்ந்து வந்தது தெரியவந்தது.
இதற்காக ஜெயஸ்ரீ தன்னை ஆண் போல சிகை அலங்காரம் செய்து கொண்டு, தன்னை ஆணாக பாவித்து கொண்டுள்ளார். பின்னர் அவர்களை மதுரைக்கு அழைத்து வந்தனர். போலீசார் கடந்த மாதம் 27-ந்தேதி ஜெயஸ்ரீயை கோர்ட்டில் ஆஜர்படுத்தினர். அவர் மேஜர் என்பதால் அவர் விருப்பப்படி செல்லலாம் என கோர்ட்டு தெரிவித்தது.
ஆனால் அவரது குழந்தையை வளர்க்க முடியாமல் உறவினர்கள் சிரமப்படுவதாக செல்வராணி தரப்பில் தெரிவிக்கப்பட்டது. இதையடுத்து வழக்கு விசாரணை ஒத்திவைக்கப்பட்டது.
ஆஜரானார்
இந்தநிலையில் அந்த வழக்கு நீதிபதிகள் பாரதிதாசன், ஆனந்தி ஆகியோர் முன்பு நேற்று மீண்டும் விசாரணைக்கு வந்தது. அப்போது ஜெயஸ்ரீ ஆஜரானார்.
இந்தநிலையில், செல்வராணி வக்கீல் ஆஜராகி, “ஜெயஸ்ரீ தன் 2 வயது குழந்தையை தவிக்க விட்டு சென்றுவிட்டார். சட்டப்படி இது குற்றம். அவர் மீது இந்திய தண்டனைச்சட்டப்பிரிவு 317-ன் கீழ் கிரிமினல் வழக்குபதிவு செய்ய போலீசாருக்கு உத்தரவிட வேண்டும்” என்று கோரினார்.
இதற்கு நீதிபதிகள் மறுத்துவிட்டனர். மேலும், “ஜெயஸ்ரீ மேஜர் என்பதால் அவரது விருப்பப்படி செல்ல கோர்ட்டு அனுமதிக்கிறது. மனுதாரர் தனது புகாரை சம்பந்தப்பட்ட போலீசில் தெரிவித்து நடவடிக்கை கோரலாம்” என்று உத்தரவிட்ட நீதிபதிகள், வழக்கை முடித்து வைத்தனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
