திண்டுக்கல்லில் ‘காண்டிராக்டரை காணவில்லை’ என்ற சுவரொட்டியால் பரபரப்பு

திண்டுக்கல்:

திண்டுக்கல்-நத்தம் சாலையில் 4 வழிச்சாலை அமைக்கும் பணி கடந்த 3 வருடங்களாக நடந்து வருகிறது. இந்த சாலையை அகலப்படுத்தும்போது காவிரி கூட்டுக்குடிநீர் குழாயில் உடைப்பு ஏற்படுகிறது. மின்சார கம்பங்களை மாற்றி அமைக்கும் போது மின் தடை ஏற்படுகிறது. மேலும் சாலை குண்டும், குழியுமாக காணப்படுகிறது. இதை சரி செய்வதற்கு சம்பந்தப்பட்ட காண்டிராக்டர் நடவடிக்கை எடுக்கவில்லை என்று கூறப்படுகிறது. 

இந்தநிலையில் திண்டுக்கல்-நத்தம் சாலையில் குள்ளனம்பட்டி, நல்லாம்பட்டி பிரிவு, பொன்னகரம் ஆகிய பகுதிகளில் மார்க்சிஸ்ட் கம்யூனிஸ்டு கட்சியினரால், மனித உயிர்களை காவு வாங்கும் நத்தம் சாலை காண்டிராக்டரை காணவில்லை, மாநகராட்சி நிர்வாகமே நத்தம் சாலையில் உள்ள தெரு விளக்குகளை எரிய வை, குண்டும் குழியுமான சாலையை சரி செய்து பொதுமக்கள் உயிர்களை பாதுகாத்திடு என சுவரொட்டி ஒட்டப்பட்டுள்ளது. இந்த சுவரொட்டியால் அப்பகுதியில் பரபரப்பு ஏற்பட்டது.