அரசு போக்குவரத்து தொழிலாளர்கள் ஆர்ப்பாட்டம்

நெல்லை:

நெல்லை வண்ணார்பேட்டை அரசு போக்குவரத்து கழக அலுவலகம் முன்பு நேற்று அரசு போக்குவரத்து கழக சி.ஐ.டி.யு. தொழிலாளர்கள் ஆர்ப்பாட்டம் நடத்தினார்கள். சங்க தலைவர் ராமதாஸ் தலைமை தாங்கினார். மாநில குழு உறுப்பினர் பெருமாள் போராட்டத்தை தொடங்கி வைத்து பேசினார். போக்குவரத்து சம்மேளன பொதுச்செயலாளர் ஆறுமுகநயினார் பல்வேறு கோரிக்கைகளை வலியுறுத்தி பேசினார்.

அரசு போக்குவரத்து தொழிலாளர்களுக்கு ஊதிய உயர்வு ஒப்பந்த பேச்சுவார்த்தையை உடனே தொடங்க வேண்டும். சட்டப்படி குறைந்தபட்ச கூலி மற்றும் தீபாவளி போனஸ் 25 சதவீதம் வழங்க வேண்டும். அகவிலைப்படி உயர்வு நிலுவையை வழங்க வேண்டும். ஓய்வுபெற்றவர்களுக்கு பணப்பலன்கள், அகவிலைப்படி உயர்வு, மருத்துவ காப்பீடு உடனே வழங்க வேண்டும் என்பன உள்ளிட்ட கோரிக்கைகளை வலியுறுத்தி இந்த ஆர்ப்பாட்டம் நடந்தது. பொதுச்செயலாளர் ஜோதி, துணை தலைவர் வன்னியபெருமாள், சம்மேளன குழு உறுப்பினர் சங்கிலிபூதத்தார், துணை பொதுச்செயலாளர் பாலசுப்பிரமணியன் உள்பட பலர் கலந்து கொண்டனர்.