தினத்தந்தி புகார் பெட்டி

பெரம்பலூர் மாவட்டம், வைத்தியநாதபுரம்  கிராமத்தில் அப்பகுதி மக்களின் குடிநீர் தேவைக்காக  மேல்நிலை நீர்த்தேக்க தொட்டி அமைக்கப்பட்டுள்ளது. இந்த மேல்நிலை நீர்த்தேக்க தொட்டி அமைக்கப்பட்டு பல ஆண்டுகள் ஆனதால் தற்போது அதன் தூண்கள் பழுதடைந்து இடிந்து விழும் நிலையில் உள்ளது. பொதுமக்கள் நடமாட்டத்தின்போது இந்த நீர்த்தேக்க தொட்டி இடிந்து விழுந்தால் உயிரிழப்பு ஏற்பட அதிக வாய்ப்பு உள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம். 

பொதுமக்கள், வைத்தியநாதபுரம், பெரம்பலூர்.

பெரம்பலூர் மாவட்டம் காரியானூர் சோலைநகர் பகுதியில் உள்ள வீடுகளுக்கு சீரான நிலையில் மின்சாரம் வினியோகம் செய்யும் வகையில், அப்பகுதியில் மின்மாற்றி அமைக்கப்பட்டுள்ளது. இந்த மின்மாற்றி அமைக்கப்பட்டு பல ஆண்டுகள் ஆனதால் தற்போது மின்மாற்றியை தாங்கி நிற்கும் மின்கம்பங்கள் பழுதடைந்து எப்போது வேண்டுமானாலும் முறிந்து கீழே விழும் நிலையில் உள்ளது. பொதுமக்கள் நடமாட்டத்தின்போது இந்த மின்மாற்றி கீழே விழுந்தால் உயிரிழப்பு ஏற்படுவதுடன் அப்பகுதியில் உள்ள மின்சாதன பொருட்கள் சேதம் அடைய அதிக வாய்ப்பு உள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம். 

பொதுமக்கள்,  காரியானூர், பெரம்பலூர். 

அரியலூர் மாவட்டம், புதுப்பாளையம் ஊராட்சி கடுங்காலி கொட்டாய் பகுதியில் அமைக்கப்பட்டுள்ள மின்கம்பம் பழுதடைந்து சிமெண்டு பூச்சுகள் உதிர்ந்து கம்பிகள் வெளியே தெரிகிறது. மின்கம்பம் முறிந்து விழுந்தால் பெரும் உயிரிழப்பு ஏற்பட அதிக வாய்ப்பு உள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம். 

பொதுமக்கள், கடுங்காலி, அரியலூர். 

கரூர் மாவட்டம், தான்தோன்றி ஒன்றியம், ஜெகதாபி பஞ்சாயத்துக்கு உட்பட்ட ஆனந்த கவுண்டனூரில் வடிகால் வசதி இல்லாததால் மழை பெய்யும்போது, ஆங்காங்கே மழைநீர் தேங்கி நிற்கிறது. இதில் இருந்து கொசுக்கள் அதிக அளவில் உற்பத்தியாகி இப்பகுதியில் நோய் பரவும் அபாயம் உள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்கவேண்டும் என கேட்டுக்கொள்கிறோம். 

பொதுமக்கள், ஜெகதாபி, கரூர். 

உப்பிலியபுரம் போலீஸ் நிலையம் தொடங்கப்பட்டு 84 ஆண்டுகளாகிறது. எரகுடியில் உள்ள புறக்காவல் நிலையமும் இந்த காவல்நிலைய கட்டுப்பாட்டுக்குள் உட்பட்டது. இங்கு ஒரு சப்-இன்ஸ்பெக்டர், 22 போலீசார் பணியாற்றி வருகின்றனர். இப்பகுதியில் சமூக குற்ற நடவடிக்கைகள், சைபர்கிரைம் குற்றங்கள் அதிகரித்து வருகிறது.  எனவே இதனை தடுக்க உப்பிலியபுரம் போலீஸ் நிலையத்தை இன்ஸ்பெக்டர் அந்தஸ்துடன் மேம்படுத்தவும், எரகுடி புறக்காவல் நிலையத்தை சப்-இன்ஸ்பெக்டர் அந்தஸ்துடன் போலீஸ் நிலையமாக மாற்றவும், பச்சைமலை, புளியஞ்சோலை பகுதிகளில் புறக்காவல் நிலையங்கள் அமைக்கவும் நடவடிக்கை எடுக்க வேண்டும் என கேட்டுக்கொள்கிறோம். 

பொதுமக்கள், உப்பிலியபுரம், திருச்சி. 

திருச்சி மாவட்டம், காட்டுப்புத்தூர் பேரூராட்சியில் 15 வார்டுகள் உள்ளன. இதில் சுமார் 2,430-க்கும் மேற்பட்ட குடியிருப்புகள் உள்ளது. மேலும் காட்டுப்புத்தூரை சுற்றியுள்ள பகுதியில் 24 ஊராட்சிகள் உள்ளன. இதில் சுமார் 7 ஆயிரத்துக்கும் மேற்பட்ட குடும்பத்தினர்  வசித்து வருகின்றனர். இந்தப்பகுதிகளில் ஏதேனும் தீ விபத்துக்கள் மற்றும் மீட்புப்பணிகள் குறித்த விபத்துக்கள் ஏற்பட்டால் முசிறி, கரூர், நாமக்கல் பகுதியில் இருந்து தீயணைப்பு வாகனம் வரவழைக்கப்பட்டு தீயணைப்புதுறை வீரர்கள் மூலம் மீட்பு பணி மேற்கொள்ளப்படும், இவ்வாறு நடைபெறும் நிகழ்வின்போது முசிறி, கரூர், நாமக்கல் பகுதியில் இருந்து வரும் தீயணைப்பு படையினர் காட்டுப்புத்தூர் பகுதிக்கு வருவதற்கு சுமார் ஒரு மணி நேரத்திற்கும் மேல் ஆகிறது. எனவே காட்டுப்புத்தூரில் தீயணைப்பு நிலையம் அமைக்க வேண்டும் என கேட்டுக்கொள்கிறோம். 

பொதுமக்கள், காட்டுப்புத்தூர், திருச்சி. 

புதுக்கோட்டை மாவட்டம், விராலிமலை தெற்குத்தெருவில் உள்ள பழைய சொசைட்டி கட்டிடத்தை இடித்துவிட்டு புது கட்டிடம் கட்டப்பட்டுள்ளது. ஆனால் இன்னும் பயன்பாட்டிற்கு கொண்டுவரப்படாமல் கடந்த 6 மாதங்களாக அப்படியே உள்ளது. இதனால் இந்த கட்டிடம் மது அருந்தும்  கூடாரமாக மாறி வருகிறது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம்.

பொதுமக்கள், விராலிமலை, புதுக்கோட்டை.