‘தினத்தந்தி‘ புகார் பெட்டி மக்கள் குறைகள் தொடர்பான பதிவுகள்

சென்னை ராயபுரம் பழைய வண்ணாரப்பேட்டை பாலு தெருவில் மூடியில்லாத கழிவுநீர் கால்வாய் குறித்த செய்தி, தினத்தந்தி புகார் பெட்டியில் வெளியானது. இதையடுத்து அந்த பாதாள சாக்கடை உடனடியாக சீரமைக்கப்பட்டுள்ளது. இதற்கு அப்பகுதி மக்கள் பாராட்டும், நன்றியும் தெரிவித்து உள்ளனர். 

சென்னை மேற்கு மாம்பலம் மேற்கு கவரை தெரு பகுதியில் உள்ள தெரு பலகையில் நோட்டீசுகள் ஒட்டப்பட்டு தெருவின் பெயரே காணாமல் போயிருந்த செய்தி தினத்தந்தி புகார் பெட்டியில் வெளியானது. இதனைத்தொடர்ந்து அந்த பலகையில் தெருவின் பெயர் பொறிக்கப்பட்டு இருக்கிறது.

காஞ்சீபுரம் மாவட்டம் குன்றத்தூர் ஒன்றியம் வைப்பூர் ஊராட்சி வஞ்சுவாஞ்சேரி அண்ணாசாலை நடுவே போக்குவரத்துக்கு இடையூறாக மின்கம்பம் இருக்கும் செய்தி தினத்தந்தி புகார் பெட்டியில் வெளியானது. இதையடுத்து சம்பந்தப்பட்ட அந்த மின்கம்பம் அகற்றப்பட்டு உள்ளது. மின்வாரிய அதிகாரிகளின் இந்த உடனடி நடவடிக்கைக்கு அப்பகுதி மக்கள் பாராட்டு தெரிவித்துள்ளனர். ஆனால் அதேவேளை அகற்றப்பட்ட அந்த மின்கம்பம் அப்படியே சாலையில் போடப்பட்டிருப்பது சற்று வருத்தத்தை ஏற்படுத்தி இருப்பதாகவும் தெரிவித்து இருக்கிறார்கள்.

சென்னை மந்தவெளிப்பாக்கம் டிரஸ்ட் கிராஸ் தெருவில் கடந்த 3 ஆண்டுகளுக்கும் மேலாக சாலையோரம் கம்பம் ஒன்று போடப்பட்டுள்ளது. இது பாதசாரிகளுக்கு இடையூறாக இருந்து வருகிறது. கேட்பாரற்று கிடக்கும் இந்த கம்பத்தை அகற்ற நடவடிக்கை எடுக்கப்படுமா?

- பொதுமக்கள், மந்தவெளிபாக்கம். 

சென்னை பழைய பல்லாவரம் ஆர்.கே.வி. அவென்யூ. 6 வது மற்றும் 7-வது தெருக்களின் சந்திப்பில் உள்ள மழைநீர் கால்வாய் செடிகொடிகள் சூழ்ந்த புதராக காணப்படுகிறது. இதனால் மழைக்காலங்களில் மழைநீர் செல்ல தடை ஏற்பட்டு, சாலையில் மழைநீர் தேங்கும் சூழ்நிலை உருவாகிறது.

- பொதுமக்கள், பழைய பல்லாவரம்

சென்னை அம்பத்தூர் அத்திப்பேடு வானகரம் மெயின் ரோட்டில் உள்ள பில்லர் பாக்ஸ் மின் பெட்டி பழுதடைந்து இருக்கிறது. மின்வயர்கள் வெளியே நீட்டிக்கொண்டு இருக்கின்றன. மழைக்காலத்தின்போது இப்பகுதியில் தண்ணீர் தேங்கும் என்பதால், உடனடியாக இந்த பில்லர் பாக்ஸ் மாற்றப்பட வேண்டும்.

- பொதுமக்கள், அம்பத்தூர். 

சென்னை அசோக்நகர் மேம்பாலம் கீழே (காசி தியேட்டர் அருகே) சாலையில் கழிவுநீர் ஆங்காங்கே தேங்கி கிடக்கிறது. இதனால் அந்த வழியாக செல்லும் வாகன ஓட்டிகளுக்கும், பாதசாரிகளுக்கும் பெரும் இடையூறு ஏற்படுகிறது.

- நிஷாந்தி, அசோக்நகர். 

சென்னை மடிப்பாக்கம் கார்த்திகேயபுரம் ஏரிக்கரை தெருவில் மழைநீர் வடிகால்வாய் கட்டமைப்பு இல்லை. தற்போது தெருவில் உள்ள மின்விளக்கும் எரியாமல் இருக்கிறது. இதனால் பொதுமக்கள் சிரமத்தை எதிர்கொண்டு வருகிறார்கள். எனவே எரியாத தெருவிளக்கை எரிய செய்வதுடன், உரிய மழைநீர் வடிகால் கட்டமைப்பை ஏற்படுத்தவும் சம்பந்தப்பட்ட அதிகாரிகள் நடவடிக்கை எடுக்கவேண்டும்.

- பத்மா, கார்த்திகேயபுரம்.