ரூ.37 லட்சம் கடத்தல் தங்கம் பறிமுதல்; புதுக்கோட்டை வாலிபர் கைது

செம்பட்டு,அக்.31-
திருச்சி விமான நிலையத்துக்கு நேற்று முன்தினம் இரவு ஷார்ஜாவில் இருந்து ஏர் இந்தியா எக்ஸ்பிரஸ் விமானம் வந்தது. இந்த விமானத்தில் வந்த பயணிகளை மத்திய நுண்ணறிவு பிரிவு அதிகாரிகள் சோதனை செய்துகொண்டிருந்தனர். அப்போது புதுக்கோட்டை மாவட்டம் கந்தர்வகோட்டையை சேர்ந்த சரவணன் (வயது 26) என்பவர் தனது உடலில் மறைத்து வைத்து 750 கிராம் தங்கத்தை கடத்தி வந்தது கண்டுபிடிக்கப்பட்டது. இதனையடுத்து அவரை கைது செய்து தங்கத்தை பறிமுதல் செய்தனர். பறிமுதல் செய்யப்பட்ட தங்கத்தின் மதிப்பு ரூ.37 லட்சம் ஆகும்.