தினத்தந்தி புகார் பெட்டி

திருவாரூர் மாவட்டம் திரு.வி.க அரசு கலைக்கல்லூரியில் தற்காலிகமாக கொரோனா சிறப்பு சிகிச்சை மையம் அமைக்கப்பட்டது. இதற்கு வசதியாக வகுப்பறைகளில் சிகிச்சை அளிப்பதற்காக படுக்கை வசதியும் செய்து கொடுக்கப்பட்டிருந்தது. இந்த நிலையில் தற்போது கொரோனா தொற்று குறைந்து உள்ளதால் சிகிச்சைக்கு வந்தவர்கள் நலமாக வெளியேற்றப்பட்டனர். இதைத்தொடர்ந்து கல்லூரி கட்டிடம் மீண்டும் மாணவர்கள் பயன்பாட்டுக்கு கொண்டு வரப்பட்டுள்ளது. ஆனால், வகுப்பறைகளில் சிகிச்சை பெற்றவர்களுக்காக போடப்பட்டிருந்த படுக்கைகள் அகற்றப்படாமல் உள்ளது. இதனால் மாணவ-மாணவிகள் மிகுந்த அச்சத்துடன் காணப்படுகின்றனர். எனவே, சம்பந்தப்பட்ட அதிகாரிகள் உரிய நடவடிக்கை எடுக்க வேண்டும் என்பதே மாணவர்களின் கோரிக்கையாகும்.

-மாணவர்கள், திருவாரூர்.

ஆபத்தான மின்கம்பம் 

நாகை மாவட்டம் நாகூர் மெயின் சாலையில் மின்கம்பம் ஒன்று ஆபத்தான நிலையில் உள்ளது. இந்த மின்கம்பம் பராமரிப்பின்றி வளைந்தும், முறிந்து விழும் நிலையிலும் உள்ளது. இதனால் அந்த வழியாக செல்லும் வாகன ஓட்டிகள் அச்சத்துடன் சென்று வருகின்றனர். மேலும், மின்கம்பத்தின் அருகே உள்ள வீட்டில் உள்ளவர்கள் மின்கம்பத்தால் விபத்து ஏற்பட்டு விடுமோ? என அச்சம் தெரிவிக்கின்றனர். எனவே, அசம்பாவிதம் எதுவும் ஏற்படும் முன்பு ஆபத்தான நிலையில் உள்ள மின்கம்பத்தை சீரமைக்க சம்பந்தப்பட்ட அதிகாரிகள் நடவடிக்கை எடுக்க வேண்டும் என்பதே பொதுமக்களின் கோரிக்கையாகும்.

-தாரிக்ராஜா, நாகூர்.