கிரிக்கெட் விளையாடிய போது தகராறு 4 பேருக்கு அரிவாள் வெட்டு

முசிறி அருகே அய்யம்பாளையம் ஊராட்சி அந்தரப்பட்டி கிராமத்தை சேர்ந்தவர் பழனிசாமி (வயது 30). கொள்ளுகட்டி பாளையத்தை சேர்ந்த சதீஷ் மற்றும் சில நண்பர்கள் சேர்ந்து நேற்று மது அருந்தியதாக தெரிகிறது. அப்போது கிரிக்கெட் விளையாடியது தொடர்பாக பழனிசாமி, சதீஷ் ஆகியோரிடையே தகராறு ஏற்பட்டது. இந்தநிலையில் நேற்று இரவு சதீஷ், 10 பேருடன் அந்தரபட்டி கிராமத்திற்கு சென்று பழனிசாமியை சரமாரியாக தாக்கி அரிவாளால் வெட்டினர். அதனை தடுக்க சென்ற ரெங்கநாதன் மனைவி வளர்மதி(26), பரமன் மகன் கல்ராயன் (55), பழனியாண்டி மகன் சண்முகம் ஆகியோரையும் அரிவாளால் தாக்கி உள்ளனர். இதில் 4 பேருக்கும் காயம் ஏற்பட்டது. மேலும், அவர்களுக்கு சொந்தமான 4 ஆடுகளையும் அந்த நபர்கள் அரிவாளால் வெட்டியதில் 3 ஆடுகள் சம்பவ இடத்திலேயே இறந்து போயின. இதுகுறித்து தகவல் அறிந்த முசிறி துணை போலீஸ் சூப்பிரண்டு அருள்மணி, இன்ஸ்பெக்டர் (பொறுப்பு) மோகன்ராஜ் மற்றும் போலீசார் சம்பவ இடத்திற்கு சென்று விசாரணை நடத்தினர். சம்பவம் தொடர்பாக போலீசார் வழக்குபதிந்து தப்பி ஓடிய நபர்களை தேடி வருகின்றனர். இச்சம்பவம் அப்பகுதியில் பரபரப்பை ஏற்படுத்தி உள்ளது.