ஆற்றில் மூழ்கி பள்ளி மாணவர் பலி

லால்குடி:

திருச்சி மாவட்டம் லால்குடி வடக்கு சீனிவாசபுரம் தெருவில் வசிப்பவர் கோவிந்தராஜன்(வயது 53). இவர் திருச்சியில் உள்ள ஒரு கடையில் வேலை பார்த்து வருகிறார். இவருக்கு ஒரு மகள் மற்றும் சஞ்சீவி(13) என்ற மகன் உண்டு. சஞ்சீவி ஒரு தனியார் பள்ளியில் 8-ம் வகுப்பு படித்து வந்தார். தீபாவளி விடுமுறையையொட்டி தனது மகள் மற்றும் மகனை லால்குடியில் வசிக்கும் தனது தாய் வீட்டில் விட்டுவிட்டு, கோவிந்தராஜன் கோயம்புத்தூரில் உள்ள தனது தங்கை வீட்டிற்கு தீபாவளி சீர் கொடுக்க சென்றார். இந்நிலையில் நேற்று நண்பர்கள் 2 பேருடன் குளிக்க அருகில் உள்ள மோட்டார் செட்டுக்கு செல்வதாக தனது பாட்டியிடம் சஞ்சீவி கூறிவிட்டு சென்றார். ஆனால் அவர்கள் அருகில் உள்ள கொள்ளிடம் ஆற்றுக்கு குளிக்க சென்றுள்ளனர். இதில் முதலில் சஞ்சீவி ஆற்றில் இறங்கியதாக கூறப்படுகிறது. ஆனால் அவருக்கு நீச்சல் தெரியாததால் தண்ணீரில் தத்தளித்து மூழ்கினார்.

இதைக்கண்ட அவரது நண்பர்கள் சத்தம் போட்டனர். மேலும் சஞ்சீவி வீட்டிற்கு தகவல் தெரிவித்தனர். இந்நிலையில் இது பற்றி தகவல் அறிந்து அங்கு வந்த லால்குடி போலீசார், பொதுமக்கள் உதவியுடன் தண்ணீரில் இருந்து சஞ்சீவியின் உடலை மீட்டு, லால்குடி அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இது குறித்து வழக்குப்பதிவு செய்து விசாரணை நடத்தி வருகின்றனர். ஆற்றில் மூழ்கி மாணவர் இறந்த சம்பவம் அப்பகுதியில் சோகத்தை ஏற்படுத்தியுள்ளது.