4 டன் ரேஷன் அரிசி கடத்தியவர் கைது

திருச்சி அரியமங்கலம் காட்டூர் பகுதியில் ஒருவர் ரேஷன் அரிசி கடத்தி வைத்திருப்பதாக உணவு பொருள் கடத்தல் தடுப்பு பிரிவு போலீசாருக்கு தகவல் கிடைத்தது. அதன்பேரில் இன்ஸ்பெக்டர் விவேகானந்தன் தலைமையில் சப்-இன்ஸ்பெக்டர் அலாவுதீன் மற்றும் போலீசார் சம்பவ இடத்திற்கு சென்று சோதனை நடத்தினார்கள்.அப்போது அரியமங்கலம் திடீர் நகர் பகுதியில் உள்ள குடோனில் இஸ்மாயில் (வயது 40) என்பவர் சுமார் 4½ டன் ரேஷன் அரிசியை மூட்டை, மூட்டையாக பதுக்கி வைத்து இருந்ததை கண்டுபிடித்தனர்.

விசாரணையில் இஸ்மாயில் அந்த பகுதியை சுற்றிலும் உள்ள பொதுமக்களிடம் இருந்து ரேஷன் கடைகளில் இருந்து வாங்கிய அரிசியை விலைக்கு வாங்கி, மொத்தமாக அந்த பகுதியில் உள்ள டிபன் கடை, ஓட்டல்கள், மாட்டு தீவனம் தேவைப்படும் நபர்கள் உள்ளிட்ட அனைவருக்கும் குடங்கள் மூலமாக சப்ளை செய்து வந்தது தெரிய வந்தது.

அதன்பேரில், அவரை கைது செய்த போலீசார் ரேஷன் அரிசியை பறிமுதல் செய்தனர். பின்னர் அவர் கோர்ட்டில் ஆஜர்படுத்தப்பட்டு மணப்பாறை சிறையில் அடைக்கப்பட்டார்.