ஆடு மேய்க்க சென்றபோது கால்வாயில் தவறி விழுந்து பெண் பலி

தேவதானப்பட்டி:

தேவதானப்பட்டி அருகே உள்ள அ.ரெங்கநாதபுரத்தை சேர்ந்தவர் போதுமணி (வயது 47). ஆடுகள் மேய்த்து வந்தார். இவர் நேற்று முன்தினம் அ.வாடிப்பட்டி அருகே 18-ம் கால்வாய் பகுதியில் ஆடுகள் மேய்க்க சென்றார். அப்போது அவர் திடீரென எதிர்பாராத வகையில் கால் தவறி கால்வாயில் விழுந்தார். 

இதையடுத்து வெள்ளத்தில் அடித்து செல்லப்பட்ட அவர் தண்ணீரில் மூழ்கி பரிதாபமாக இறந்தார். பின்னர் அவரது உடல் கால்வாயில் மிதந்தது. இதை கால்வாயில் குளித்து கொண்டிருந்தவர்கள் பார்த்து அவரது உடலை மீட்டனர். இதுகுறித்து ஜெயமங்கலம் போலீசாருக்கு தகவல் தெரிவிக்கப்பட்டது. அதன்பேரில் போலீசார் விரைந்து வந்து போதுமணியின் உடலை கைப்பற்றி பிரேத பரிசோதனைக்காக தேனி அரசு மருத்துவ கல்லூரி மருத்துவமனைக்கு அனுப்பி வைத்தனர். மேலும் இதுதொடர்பாக போலீசார் வழக்குப்பதிவு செய்து விசாரித்து வருகின்றனர்.