தூத்துக்குடியில் மாவட்ட வேலைவாய்ப்பு அலுவலகம் சார்பில் சுமார் ஒன்றரை ஆண்டுகளுக்கு பிறகு நேரடியாக தனியார் வேலைவாய்ப்பு முகாம் நாளை நடக்கிறது

தூத்துக்குடியில் மாவட்ட வேலைவாய்ப்பு அலுவலகம் சார்பில் சுமார் 1½ ஆண்டுகளுக்கு பிறகு நேரடியாக தனியார் வேலைவாய்ப்பு முகாம் நாளை (வெள்ளிக்கிழமை) நடக்கிறது.

தூத்துக்குடி மாவட்ட வேலைவாய்ப்பு மற்றும் தொழில்நெறி வழிகாட்டு மையத்தில் வாரம் தோறும் வெள்ளிக்கிழமை தனியார் வேலைவாய்ப்பு முகாம் நடத்தப்பட்டு வந்தது. கடைசியாக கடந்த மார்ச் 13-ந்தேதி தனியார் வேலைவாய்ப்பு முகாம் நடந்தது. அதன்பிறகு கொரோனா தொற்று காரணமாக வேலைவாய்ப்பு முகாம் நடக்கவில்லை.

இந்த நிலையில் தற்போது கொரோனா தொற்று குறைந்ததை தொடர்ந்து வேலைவாய்ப்பு முகாம் நடத்த அரசு அனுமதி அளித்துள்ளது. இதையடுத்து சுமார் ஒன்றரை ஆண்டுகளுக்கு பிறகு நாளை (வெள்ளிக்கிழமை) தனியார் வேலைவாய்ப்பு முகாம் நடக்கிறது என்று மாவட்ட வேலைவாய்ப்பு மற்றும் தொழில்நெறி வழிகாட்டும் மைய உதவி இயக்குநர் பேச்சியம்மாள் கூறியுள்ளார்.

மேலும் இதுபற்றி அவர் வெளியிட்டுள்ள செய்திக்குறிப்பில்  கூறியிருப்பதாவது:-

தூத்துக்குடி மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தின் மூலம் தனியார் துறை வேலைவாய்ப்பு முகாம் நாளை (வெள்ளிக்கிழமை) காலை 10.30 மணி அளவில் தூத்துக்குடி கோரம்பள்ளத்தில் அமைந்துள்ள மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் வைத்து நடக்கிறது.

இந்த தனியார் துறை வேலைவாய்ப்பு முகாமில் பல முன்னணி நிறுவனங்கள் பங்கேற்க உள்ளன. இந்த முகாமில் 10-ம் வகுப்பு, பிளஸ் 2, பட்டப்படிப்பு, டிப்ளமோ, ஐ.டி.ஐ. பொறியியல் மற்றும் கணினி பயிற்சி கல்வித் தகுதியுடைய பதிவுதாரர்கள் கலந்து கொள்ளலாம். இந்த தகுதியுள்ள தனியார் துறையில் பணிபுரிய விருப்பம் உள்ளவர்கள் தங்களது பயோடேட்டா மற்றும் கல்வி சான்றுகளுடன் தூத்துக்குடி மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் நடைபெறும் முகாமில் கலந்து கொள்ளலாம். 

தனியார்துறை நிறுவனங்களில் பணி நியமனம் செய்யப்படும் பட்சத்தில் வேலைவாய்ப்பு அலுவலக பதிவு ரத்து ஆகாது.

தனியார் நிறுவனத்தினரும் தங்களுக்கு தேவையான பணியாளர்களை தேர்வு செய்ய இம்முகாமில் கலந்து கொள்ளலாம். மேலும் விபரங்களுக்கு 0461-2340159 என்ற அலுவலக தொலைபேசி எண்ணில் தொடர்பு கொள்ளலாம். இவ்வாறு அவர் ெதரிவித்துள்ளார்.