மரத்தில் மோட்டார் சைக்கிள் மோதி டிரைவர் பலி

அச்சன்புதூர்:

புளியங்குடி சிந்தாமணி இளவாணியர்குடி தெருவைச் சேர்ந்தவர் மாடசாமி (வயது 43). லாரி டிரைவரான இவர் நேற்று இரவில் கடையநல்லூர் அருகே சொக்கம்பட்டியில் இருந்து தனது ஊருக்கு மோட்டார் சைக்கிளில் சென்று கொண்டிருந்தார். சொக்கம்பட்டி அருகில் சென்றபோது, எதிர்பாராதவிதமாக சாலையோர புளியமரத்தில் மோட்டார் சைக்கிள் மோதியது. இதில் பலத்த காயமடைந்த மாடசாமி சம்பவ இடத்திலேயே பரிதாபமாக உயிரிழந்தார். 

இதுகுறித்து தகவல் அறிந்ததும், சொக்கம்பட்டி போலீசார் விரைந்து சென்று, இறந்த மாடசாமியின் உடலைக் கைப்பற்றி பிரேத பரிசோதனைக்காக கடையநல்லூர் அரசு ஆஸ்பத்திரிக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.