டீக்கடையில் ரகளையில் ஈடுபட்ட 2 ரவுடிகளை பிடித்து பொதுமக்கள் தர்ம அடி

திருச்சி ஸ்ரீரங்கம் அம்மா மண்டபம் பகுதியைச் சேர்ந்தவர் கோவிந்தராவ். இவர் திருச்சி-கரூர் பைபாஸ் ரோட்டில் டீக்கடை நடத்தி வருகிறார். நேற்று இரவு இவரது கடைக்கு கஞ்சா போதையில் வந்த 2 வாலிபர்கள், கடையில் இருந்த கேசியரிடம் பணம் கேட்டு தகராறு செய்தனர். அவர் பணம் கொடுக்க மறுக்கவே, ஆத்திரம் அடைந்த அவர்கள் கண்ணாடி பாட்டில்களை உடைத்து ரகளை செய்தனர். இதைப்பார்த்த அப்பகுதி பொதுமக்கள், அவர்கள் 2 பேரையும் பிடித்து அங்கிருந்த இரும்பு கம்பத்தில் கட்டி வைத்து தர்ம அடி கொடுத்தனர்.

இதுபற்றி தகவல் அறிந்த உறையூர் போலீசார் சம்பவ இடத்துக்கு விரைந்து சென்று அவர்களை மீட்டு சிகிச்சைக்காக திருச்சி அரசு ஆஸ்பத்திரியில் சேர்த்தனர். ரகளையில் ஈடுபட்டவர்கள் மலைக்கோட்டை பகுதியை சேர்ந்த பிரபல ரவுடிகள் என்பதும், அவர்கள் திருட்டு, வழிப்பறி வழக்கில் சம்பந்தப்பட்டு இருப்பதும் தெரியவந்தது. இந்த சம்பவம் குறித்து போலீசார் தொடர்ந்து விசாரணை நடத்தி வருகிறார்கள்.