கோவில்களில் கும்பாபிஷேக விழா

பெரம்பலூர்:

பெரம்பலூர் அருகே உள்ள கவுள்பாளையம் காளியம்மன் நகரில் விநாயகர், மங்கள மாரியம்மன் ஆகிய தெய்வங்களுக்கு தனித்தனியாக புதிதாக கோவில்கள் கட்டப்பட்டன. இதையடுத்து அந்த கோவில்களுக்கு நேற்று கும்பாபிஷேகம் நடத்தப்பட்டது. கடந்த 1-ந்தேதி கொடியேற்றத்துடன் கும்பாபிஷேக விழா தொடங்கியது. நேற்று முன்தினம் கோவில் வளாகத்தில் பல்வேறு பூஜைகளுடன், முதல் கால யாகசாலை பூஜை நடந்தது. கும்பாபிஷேகத்தை முன்னிட்டு நேற்று காலை பல்வேறு பூஜைகளுடன் இரண்டாம் கால யாகசாலை பூஜை நடந்தது. அதனை தொடர்ந்து கடம் புறப்பாடாகி, புனித நீரை மங்கள மாரியம்மன் கோவில் கோபுர கலசங்களுக்கு ஊற்றி கும்பாபிஷேகம் செய்து, குருக்கள்கள் தீபாராதனை காட்டினர். அப்போது அங்கு கூடியிருந்த திரளான பக்தர்கள் பக்தி கோஷங்களை எழுப்பினர். அவர்கள் மீது புனித நீர் தெளிக்கப்பட்டது. இதையடுத்து மங்கள மாரியம்மனுக்கு புனித நீர் ஊற்றி கும்பாபிஷேகம் செய்து, தீபாராதனை காட்டப்பட்டது. அப்போது பக்தர்கள் அம்மனை பயபக்தியுடன் தரிசனம் செய்தனர். அதனை தொடர்ந்து அருகே உள்ள விநாயகர் கோவில் கும்பாபிஷேகம் செய்யப்பட்டது. விழாவில் கலந்து கொண்ட பக்தர்களுக்கு அன்னதானம் வழங்கப்பட்டது. இதற்கான ஏற்பாடுகளை கோவில் நிர்வாகிகள் மற்றும் கிராம மக்கள் செய்திருந்தனர்.