மோட்டார்சைக்கிளில் இருந்து தவறி விழுந்த பெண் பலி வாலிபர் கைது

எருமப்பட்டி:

எருமப்பட்டி அருகே உள்ள காளிசெட்டிப்பட்டி ஊராட்சியை சேர்ந்தவர் சுப்பிரமணி. இவருடைய மனைவி மகேஸ்வரி (வயது 55). கூலித்தொழிலாளி. இவர் வழக்கம் போல் பீமநாயக்கனூர் அருகே ரங்கசாமி என்பவரின் தோட்டத்தில் வேலை செய்து விட்டு வீட்டுக்கு செல்வதற்காக பிரகாஷ் (27) என்பவருடைய மோட்டார்சைக்கிளில் பின்னால் அமர்ந்து சென்றார். 

அப்போது பீமநாயக்கனூர் பஸ் நிறுத்தம் அருகே நல்லிகவுண்டர் தோட்டம் பகுதியில் சென்றபோது பிரகாஷ் திடீரென பிரேக் பிடித்தார். இதில் பின்னால் அமர்ந்திருந்த மகேஸ்வரி தவறி கீழே விழுந்து தலையில் பலத்த காயம் அடைந்தார். அவரை தனியார் ஆம்புலன்ஸ் மூலம் அக்கம் பக்கம் இருந்தவர்கள் உதவியுடன் நாமக்கல் அரசு மருத்துவமனைக்கு சிகிச்சைக்காக கொண்டு சென்றனர். ஆனால் அங்கு சிகிச்சை பலனின்றி மகேஸ்வரி இறந்தார். இதுகுறித்த புகாரின்பேரில் எருமப்பட்டி போலீசார் வழக்குப்பதிவு செய்து விசாரணை நடத்தி பிரகாசை கைது செய்தனர்.

======