காரிமங்கலம் அருகே மின்சாரம் தாக்கி மூதாட்டி சாவு

காரிமங்கலம்:

காரிமங்கலம் அருகே உள்ள சிக்கதிம்மனஅள்ளி கிராமத்தை சேர்ந்த தொட்டியம்மாள் (வயது 65). இவர் தனக்கு சொந்தமான விவசாய நிலத்தில் குடிசையில் இருந்து வந்துள்ளார். இவர் நேற்று முன்தினம் இரவு மழை நின்ற பின்னர் குடிசை வீட்டில் இருந்து ஊரில் உள்ள வீட்டிற்கு சாப்பிடுவதற்காக சென்றார். அப்போது வீட்டின் அருகே கிடந்த மின்வயரை மூதாட்டி மிதித்ததாக கூறப்படுகிறது. இதில் அவரை மின்சாரம் தாக்கி தூக்கி வீசியது. அவருடைய சத்தம் கேட்டு அக்கம் பக்கத்தினர் வந்து மூதாட்டியை மீட்டு காரிமங்கலம் அரசு மருத்துவமனைக்கு கொண்டு சென்றனர். அங்கு டாக்டர்கள் பரிசோதித்தபோது மூதாட்டி ஏற்கனவே இறந்து விட்டது தெரியவந்தது. இதுகுறித்து  காரிமங்கலம் போலீஸ் நிலையத்திற்கு தகவல் தெரிவிக்கப்பட்டது. அதன் பேரில் போலீசார் விரைந்து சென்று மூதாட்டியின் உடலை கைப்பற்றி பிரேத பரிசோதனைக்காக தர்மபுரி அரசு மருத்துவமனைக்கு அனுப்பி வைத்தனர். மின்சாரம் தாக்கி மூதாட்டி இறந்தது குறித்து போலீசார் வழக்குப்பதிவு செய்து விசாரணை நடத்தி வருகின்றனர்.