நகை பறிப்பில் ஈடுபட்ட 5 பேர் கைது

அருப்புக்கோட்டை, 

அருப்புக்கோட்டையில் நகை பறிப்பில் ஈடுபட்ட 5 பேரை போலீசார் கைது செய்தனர். 

அருப்புக்கோட்டையில் கடந்த சில மாதங்களாக எஸ்.பி.கே. கல்லூரி ரோடு, பெர்கின்ஸ்புரம் உள்ளிட்ட பகுதிகளில் பொதுமக்கள் நடமாட்டம் இல்லாத வீதிகளில் தனியாக நடந்து செல்லும் பெண்களை குறிவைத்து பல்வேறு நகை பறிப்பு சம்பவங்கள் நடைபெற்றன.

அடுத்தடுத்து நடைபெற்ற நகை பறிப்பு சம்பவங்களை தொடர்ந்து மாவட்ட போலீஸ் சூப்பிரண்டு மனோகர் உத்தரவுப்படி டவுன் இன்ஸ்பெக்டர் பாலமுருகன், குற்றப்பிரிவு இன்ஸ்பெக்டர் ராஜபுஷ்பா தலைமையில் சப்-இன்ஸ்பெக்டர்கள் முத்துக்குமார், பாலமுருகன் மற்றும் போலீசார் தனவேல், ராமமூர்த்தி, சரவணன் ஆகியோர் கொண்ட சிறப்பு தனிப்படை அமைக்கப்பட்டு குற்றவாளிகளை தேடும் பணி தீவிரமாக நடைபெற்று வந்தது.

இந்தநிலையில் கண்காணிப்பு கேமராவில் பதிவான காட்சிகளின் அடிப்படையில் தனிப்படை போலீசார் குற்றவாளிகளை தீவிரமாக தேடி வந்தனர்.

 இந்தநிலையில் பாலாஜி (வயது22), அசோக்குமார் (19), அருண் (22), மதன்ராஜ் (22), பாபுரிஷிகண்ணன் (20) ஆகிய 5 பேரை பிடித்துவிசாரணை மேற்கொண்டனர். 

விசாரணையில் அவர்கள் நகை பறிப்பில் ஈடுபட்டது தெரியவந்தது. 

இதையடுத்து அவர்களை கைது செய்த போலீசார், 21 பவுன் நகைகள், இருசக்கர வாகனம் உள்ளிட்டவற்றை பறிமுதல் செய்தனர்.