தூத்துக்குடியில் கமிஷன் தர மறுத்த உரக்கடை உரிமையாளரை தாக்கிய 2 வாலிபர்களை போலீசார் கைது செய்தனர்

தூத்துக்குடி ஆரோக்கியபுரம் பகுதியை சேர்ந்தவர் வைரவேல் மகன் அன்பழகன் (வயது 55). இவர் தூத்துக்குடி- எட்டயபுரம் ரோட்டில் உரக்கடை நடத்தி வருகிறார். இந்த கடையில் தூத்துக்குடி மாப்பிளையூரணி பகுதியை சேர்ந்த மாரிமுத்து மகன் அய்யாத்துரை (23) என்பவர் தினமும் ரூ.2 ஆயிரத்திற்கு கால்நடை தீவனம் வாங்கி வந்துள்ளார்.

மேலும் அவர் அன்பழகனிடம் தினமும் வாங்கும் கால்நடை தீவனத்திற்கு கமிஷன் தொகை கேட்டுள்ளார். ஆனால் அன்பழகன் கமிஷன் தர மறுத்துள்ளார். இதனால் இருவருக்கும் இடையே தகராறு ஏற்பட்டு முன்விரோதம் இருந்துள்ளது.

இந்நிலையில், கடந்த 14-ந் தேதி அய்யாத்துரை, ஆரோக்கியபுரத்தை சேர்ந்த மாணிக்கம் மகன் சஞ்சய் (20) மற்றும் சிலர் சேர்ந்து அன்பழகனிடம் தகராறு செய்து கல் மற்றும் கம்பால் தாக்கி கொலை மிரட்டல் விடுத்துள்ளனர். இதுகுறித்து அன்பழகன் அளித்த புகாரின் பேரில் சிப்காட் போலீஸ் சப்-இன்ஸ்பெக்டர் சங்கர் வழக்கு பதிவு அய்யாத்துரை மற்றும் சஞ்சய் ஆகிய 2 பேரையும் கைது செய்தார். மேலும் சிலரை போலீசார் தேடி வருகின்றனர்.