‘தினத்தந்தி’ புகார் பெட்டி

திருச்சி வயர்லெஸ் ரோடு, ஸ்டார் நகர் பின்புறம் உள்ள காலி மனையில் தேங்கி நிற்கும் மழைநீரால் அப்பகுதியில் கொசுக்கள் அதிகளவில் உற்பத்தியாகிறது. மேலும், சாலை சேறும், சகதியுமாக இருப்பதால் அந்த வழியாக வாகனங்கள் செல்ல முடியாத நிலை ஏற்பட்டு உள்ளது. எனவே சம்பந்தப்பட்ட துறை அதிகாரிகள் சாலையை சீரமைப்பதுடன், இப்பகுதியில் கொசுமருந்து அடிக்க நடவடிக்கை எடுக்க வேண்டும்.

சுபைதா பேகம், திருச்சி.

திருச்சி மாவட்டம் எடமலைப்பட்டி புதூரில் மெயின் ரோட்டில் அமைந்துள்ள  அடுக்குமாடி  குடியிருப்புகளில் குரங்குகளின் அட்டகாசம் நாளுக்கு நாள் அதிகரித்து வருகிறது. குறிப்பாக வீட்டில் வைத்திருக்கும் உணவு பொருட்களை தூக்கி செல்வதுடன், செல்போன் உள்ளிட்டவைகளை உடைத்து அட்டகாசத்தில் ஈடுபட்டு வருகின்றன. இதனால் முதியோர் மற்றும் குழந்தைகள் அச்சம் அடைந்து வருகிறார்கள். எனவே சம்பந்தப்பட்ட வனத்துறை அதிகாரிகள் இந்த குரங்குகளை கூண்டுவைத்து பிடித்து அடர்ந்த வனப்பகுதிக்குள் கொண்டுவிட நடவடிக்கை எடுக்க வேண்டும்.

தியாகராஜன், எடமலைப்பட்டி புதூர், திருச்சி.

திருச்சி மாவட்டம், தொட்டியம் தாலுகா, மணமேடு, வார்டு எண் 1-ல் மாந்தோப்பு தெருவில் உள்ள மின்கம்பம் பழுதடைந்து உள்ளது. மேலும், அதன் கான்கிரீட் உதிர்ந்து கம்பி வெளியே தெரிகிறது. எனவே இந்த மின்கம்பத்தை மாற்றக்கோரி பலமுறை புகார் தெரிவித்தும் எந்தவித நடவடிக்கையும் எடுக்கவில்லை. எனவே விபத்து ஏற்பட்டு உயிர்சேதம் ஏற்படும் முன்பு இந்த மின்கம்பத்தை அகற்ற சம்பந்தப்பட்ட துறை அதிகாரிகள் நடவடிக்கை எடுக்க வேண்டும்.

பிரபாகரன், மணமேடு, திருச்சி.

திருச்சி டி.வி.எஸ். டோல்கேட் பஸ் நிறுத்தத்தில் ஆட்டோ, வேன் உள்ளிட்ட வாகனங்கள் சாலையில் நிறுத்திவிட்டு அதன் டிரைவர்கள் வெளியே சென்றுவிடுகிறார்கள். இதனால் அந்த வழியாக செல்லும் பஸ்கள், கார் உள்ளிட்ட வாகனங்கள் போக்குவரத்து நெரிசலில் சிக்கி தவிக்கிறது. மேலும், பஸ் ஏற வரும் பயணிகளும் சிரமம் அடைந்து வருகிறார்கள். எனவே  இப்பகுதியில் போக்குவரத்தை சீரமைக்க போலீசார் நிறுத்துவதுடன், சாலையோரம் வாகனங்களை நிறுத்தி செல்வோர் மீது கடும் நடவடிக்கை எடுக்க வேண்டும்.

பூவலிங்கம், ஜே.கே. நகர், திருச்சி.

திருச்சிமாவட்டம் துறையூர் தாலுகா கொல்லப்பட்டி ஊராட்சி கொத்தம்பட்டி கிராமத்தில் அங்கன்வாடி செயல்பட்டு வருகிறது. இங்கு ஏராளமான குழந்தைகள் பராமரிக்கப்பட்டு வருகிறார்கள். இந்தநிலையில் அங்கன்வாடி மேல்தளம் பழுதடைந்து இருப்பதால் மழைக்காலங்களில் கசிவு ஏற்படுகிறது. இதனால் அங்கன்வாடியில் உள்ள குழந்தைகள் சிரமம் அடைந்து வருகிறார்கள். எனவே சம்பந்தப்பட்ட துறை அதிகாரிகள் இந்த அங்கன்வாடி கட்டிடத்தை சீரமைக்க நடவடிக்கை எடுக்க வேண்டும்.

மணி, கொத்தம்பட்டி, திருச்சி.

திருச்சி மாவட்டம் காட்டுப்புத்தூர் அருகே சிலைபிள்ளையார்புத்தூர் கோட்டகலம் அருகே தொடர் மழை காரணமாக நெற்பயிர்கள் சேதம் அடைந்தன. எனவே சம்பந்தப்பட்ட துறை அதிகாரிகள் இப்பகுதியில் ஆய்வு மேற்கொண்டு பாதிக்கப்பட்ட விவசாயிகளுக்கு நிவாரணம் வழங்க வேண்டும்.

கிருஷ்ணா, காட்டுப்புத்தூர், திருச்சி.

திருச்சி மாவட்டம் துறையூரில் இருந்து உப்பிலியபுரம், சோபனாபுரம் வழியாக டாப்செங்காட்டுப்பட்டிக்கு குறைவான பஸ்களே இயக்கப்பட்டு வருகிறது. இதனால் பள்ளி மாணவர்கள் பஸ்களின் மேற்கூரையில் அமர்ந்து ஆபத்தான பயணம் மேற்கொண்டு வருகிறார்கள். எனவே சம்பந்தப்பட்ட துறை அதிகாரிகள் உரிய நடவடிக்கை எடுக்க வேண்டும்.

மஞ்சுளா, துறையூர், திருச்சி.