இளம்பிள்ளை அருகே குடிநீர் கேட்டு பொதுமக்கள் சாலை மறியல்

இளம்பிள்ளை:

இளம்பிள்ளை அருகே குடிநீர் கேட்டு பொதுமக்கள் சாலை மறியலில் ஈடுபட்டனர்.

இளம்பிள்ளை அருகே இடங்கணசாலை பேரூராட்சிக்கு உட்பட்ட பாப்பாபட்டி 14-வது வார்டு பகுதியில் ஏராளமான பொதுமக்கள் வசித்து வருகிறார்கள். இந்த பகுதிக்கு கடந்த ஒரு வார காலமாக போதுமான குடிநீர் வினியோகம் செய்யப்படவில்லை என்று கூறப்படுகிறது. இதன் காரணமாக குடிநீர் தட்டுப்பாட்டால் பொதுமக்கள் அவதிப்பட்டு வந்தனர்.

இந்த நிலையில் நேற்று காலை அந்த பகுதியை சேர்ந்த 30-க்கும் மேற்பட்ட பொதுமக்கள் திடீரென தங்கள் பகுதிக்கு சீரான குடிநீர் வழங்க வேண்டும் என்று கோரி இளம்பிள்ளையில் இருந்து சின்னப்பம்பட்டி செல்லும் சாலையில் பாப்பாபட்டி அருகே ரோட்டில் அமர்ந்து மறியலில் ஈடுபட்டனர். இதனால் போக்குவரத்து பாதிக்கப்பட்டது.

இது குறித்து தகவல் அறிந்ததும் மகுடஞ்சாவடி போலீசார் சம்பவ இடத்துக்கு விரைந்து வந்து பொதுமக்களிடம் பேச்சுவார்த்தை நடத்தினார்கள். அப்போது அதிகாரிகளிடம் பேசி, குடிநீர் கிடைக்க உடனடியாக நடவடிக்கை எடுக்கப்படும் என உறுதி அளித்தனர். இதைத்தொடர்ந்து பொதுமக்கள் அங்கிருந்து கலைந்து சென்றனர். இதனால் அந்த பகுதியில் சிறிது நேரம் போக்குவரத்து பாதிக்கப்பட்டது.