நாமக்கல் அருகே மணல் கடத்திய 2 பேர் கைது

நாமக்கல்:

நாமக்கல் அருகே தேசிய நெடுஞ்சாலையில் உள்ள பொம்மைகுட்டைமேடு பகுதியில் ரோந்து போலீசார் வாகன சோதனையில் ஈடுபட்டனர். அப்போது அந்த வழியாக வந்த சரக்கு வாகனம் ஒன்றை தடுத்து நிறுத்தி சோதனை செய்தனர். சோதனையில் 70 மணல் மூட்டைகள் சரக்கு வாகனத்தில் கடத்தி வரப்பட்டது தெரியவந்தது. இதையடுத்து சரக்கு வாகனத்தில் வந்த 2 பேரிடம் போலீசார் விசாரணை நடத்தினர்.

போலீசாரின் முதற்கட்ட விசாரணையில், காட்டுப்புத்தூரை சேர்ந்த சத்தியமூர்த்தி (வயது 38), தொட்டியம் அருகே உள்ள நத்தம் கிராமத்தை சேர்ந்த ராஜேந்திரன் (61) ஆகியோர் காட்டுப்புத்தூரில் இருந்து மணல் மூட்டைகளை கடத்தி வந்தது தெரியவந்தது. இதையடுத்து அவர்கள் இருவரையும் போலீசார் கைது செய்தனர். மேலும் சரக்கு வாகனம் மற்றும் மணல் மூட்டைகளை போலீசார் பறிமுதல் செய்தனர்.

மணல் கடத்தல் தொடர்பாக நல்லிப்பாளையம் போலீசார் வழக்குப்பதிவு செய்து விசாரணை நடத்தி வருகின்றனர். இதனிடையே ரோந்து பணியில் ஈடுபட்டிருந்த சிறப்பு சப்-இன்ஸ்பெக்டர் ராஜேந்திரன் மற்றும் போலீஸ்காரர் செல்வராஜ் ஆகியோரை பாராட்டி நாமக்கல் துணை போலீஸ் சூப்பிரண்டு சுரேஷ் ஊக்கத்தொகை வழங்கினார்.

=======