காயல்பட்டினத்தில் கஞ்சா விற்ற வாலிபரை போலீசார் கைது செய்தனர்

திருச்செந்தூர் உதவி போலீஸ் சூப்பிரண்டு ஹர்ஸ்சிங் மேற்பார்வையில் ஆறுமுகநேரி போலீஸ் இன்ஸ்பெக்டர் செந்தில் தலைமையில் சப்-இன்ஸ்பெக்டர் சதீஷ் நாராயணன் மற்றும் போலீசார் காயல்பட்டினம் புறநகர் பகுதியில் ரோந்து சென்றனர். அப்போது காயல்பட்டினம் பப்பரப்பள்ளி என்ற சுடுகாட்டு பகுதியில் சந்தேகத்திற்கு இடமான முறையில் உச்சினிமாகாளி அம்மன் கோவில் தெருவைச் சேர்ந்த அப்துல் ரசாக் மகன் சதாம் உசேன் என்ற சிலிண்டர் சதாம் உசேன் (வயது 30) என்ற வாலிபர் நின்று கொண்டிருந்தார். அவரை பிடித்து போலீசார் விசாரணை நடத்தியபோது, அந்த பகுதியில் அவர் கஞ்சா விற்பனை செய்தது தெரியவந்தது. அவரிடம் இருந்து 1½ கிலோ கஞ்சா பறிமுதல் செய்யப்பட்டது. இதுதொடர்பாக ஆறுமுகநேரி போலீசார் வழக்குப்பதிவு செய்து அவரை கைது செய்தனர்.