கடையில் இருந்த மூதாட்டியிடம் 5 பவுன் நகை பறிப்பு

ராஜாக்கமங்கலம்:

ராஜாக்கமங்கலம் அருகே கடையில் இருந்த மூதாட்டியிடம் 5 பவுன் நகையை பறித்துச் சென்ற மர்ம நபரை போலீசார் தேடி வருகிறார்கள். 

ராஜாக்கமங்கலம் அருகே உள்ள காரவிளை பகுதியை சேர்ந்தவர் ரோஸ்தங்கம் (வயது68). இவர், காரவிளை பகுதியில் மளிகை கடை நடத்தி வருகிறார். 

இந்தநிலையில் நேற்று மதியம் அவரது கடைக்கு மோட்டார் சைக்கிளில் ஒருவர் வந்தார்.

கடைக்கு வந்த அந்த நபர் பொருட்கள் வாங்குவது போல் ரோஸ்தங்கத்திடம் பேசிக்கொண்டிருந்தார். அப்போது, திடீரென அவர், ரோஸ்தங்கத்தின் கழுத்தில் கிடந்த 5 பவுன் நகையை கண்ணிமைக்கும் நேரத்தில் பறித்தார். இதைகண்டு அதிர்ச்சி அடைந்த ரோஸ்தங்கம் திருடன்... திருடன் என சத்தம் போட்டார். அவரது சத்தம் கேட்டு அக்கம் பக்கத்தினர் வருவதற்குள் அந்த நபர் மின்னல் வேகத்தில் மோட்டார் சைக்கிளில் தப்பிச் சென்றுவிட்டார். 

பின்னர், இதுகுறித்து ரோஸ்தங்கம் கொடுத்த புகாரின் பேரில இராஜாக்கமங்கலம் போலீசார் வழக்குப்பதிவு செய்து நகையை பறித்து சென்ற மர்ம நபரை தேடி வருகிறார்கள்.