தூத்துக்குடி மாவட்டத்தில் எய்ட்ஸ் நோயை கட்டுப்படுத்த அனைவரும் ஒருங்கிணைந்து செயல்பட வேண்டும் என்று மாவட்ட கலெக்டர் செந்தில்ராஜ் கூறினார்

எய்ட்ஸ் நோயை கட்டுப்படுத்த அனைவரும் ஒருங்கிணைந்து செயல்பட வேண்டும் என்று மாவட்ட கலெக்டர் செந்தில்ராஜ் கூறினார்.

உலக எய்ட்ஸ் தின நிகழ்ச்சி தூத்துக்குடி அன்னம்மாள் கல்வியியல் கல்லூரியில் நடந்தது. மாவட்ட கலெக்டர் செந்தில்ராஜ் தலைமை தாங்கினார். நிகழ்ச்சியில் அனைத்து துறை அலுவலர்களும் உலக எய்ட்ஸ் தின உறுதிமொழி ஏற்றனர். தொடர்ந்து எச்.ஐ.வி. தடுப்பு மற்றும் பராமரிப்பு பணிகளில் சிறப்பாக பணியாற்றிய அலுவலர்கள் மற்றும் ஊழியர்களுக்கு நினைவு கேடயம் மற்றும் பாராட்டு சான்றிதழ்களை கலெக்டர் செந்தில்ராஜ் வழங்கி பேசினார். அப்போது அவர் கூறியதாவது:-

எச்.ஐ.வி., எய்ட்ஸ் என்பது தனி மனித நோய் மட்டுமல்ல. இது ஒரு பொது சுகாதார சமுதாய பிரச்சினை. எனவே நாம் அனைவரும் எச்.ஐ.வி., எய்ட்ஸ் பற்றி சரியான தகவலை முழுமையாக அறிந்திடுவோம். நாம் தெரிந்து கொண்டவற்றை நமது குடும்பங்களிலும் நமது சமுதாயத்திற்கும் தெரியப்படுத்த வேண்டும். ஆரம்ப காலத்தில் எச்.ஐ.வி. பற்றி பேசுவதற்கு அனைவரும் அச்சப்படுவார்கள். தற்பொழுது அதுபற்றிய விழிப்புணர்வு பெரும்பாலானவர்களுக்கு இருக்கிறது. இது ஒரு முன்னேற்றமான செயல்பாடாக கருதப்படுகிறது.

எச்.ஐ.வி. நோயால் பாதிக்கப்பட்ட தனிநபரையும் அவரது குடும்பத்தையும் எவ்வித பாகுபாடு இல்லாமல் அரவணைக்க வேண்டும். அரசு ஆரம்ப சுகாதார நிலையம் மற்றும் அரசு மருத்துவமனைகளில் இலவசமாக எச்.ஐ.வி. பரிசோதனை செய்து கொள்ளலாம். பாதிக்கப்பட்டோர்கள் முறையான சிகிச்சை எடுத்துக்கொள்ள வேண்டும். 2021-ம் ஆண்டு “எச்.ஐ.வி, எய்ட்ஸ் உடன் வாழும் மக்களுக்கு ஏற்படும் ஏற்றத்தாழ்வுகளை முடிவுக்கு கொண்டு வருவோம், எச்.ஐ.வி., எய்ட்ஸ் மற்றும் கொரோனா பெருந்தொற்றுக்கு முடிவு கட்டுவோம்” என்னும் கருத்துக்கு ஏற்ப தூத்துக்குடி மாவட்டத்தில் அனைவரும் ஒருங்கிணைந்து செயல்பட வேண்டும் என்று கூறினார்.

நிகழ்ச்சியில் மாவட்ட எய்ட்ஸ் தடுப்பு மற்றும் கட்டுப்பாடு அலுவலரும், சுகாதார பணிகள் துணை இயக்குனருமான பொற்செல்வன், தூத்துக்குடி மருத்துவக்கல்லூரி மருத்துவமனை முதல்வர் நேரு, மருத்துவம் ஊரக நலப்பணிகள் மற்றும் குடும்ப நல இணை இயக்குனர் முருகவேல், துணை இயக்குனர் (காச நோய் மையம்) சுந்தரலிங்கம், தூத்துக்குடி மருத்துவ கல்லூரி மருத்துவமனை ரத்த வங்கி தலைமை டாக்டர் சாந்தி மற்றும் பலர் கலந்து கொண்டனர்.