சரக்கு வேனில் கடத்திய ரேஷன் அரிசி பிடிபட்டது அண்ணன், தம்பி உள்பட 3 பேர் கைது

செங்கோட்டை:

செங்கோட்டை அருகே உள்ள புளியரை சோதனை சாவடியில் புளியரை போலீஸ் சப்-இன்ஸ்பெக்டர் முத்துகணேஷ் மற்றும் போலீசார் வாகன சோதனையில் ஈடுபட்டிருந்தனர். அப்போது அந்த பகுதியில் வந்த சரக்கு வேனை வழிமறித்து சோதனை நடத்தினர். அதில் 60 மூட்டைகளில் 3 டன் ரேஷன் அரிசி இருந்தது தெரியவந்தது. உடனே போலீசார் சரக்கு வேனில் இருந்த 3 பேரிடம் விசாரணை நடத்தினர்.

அதில், அவர்கள் சுரண்டை அருகே உள்ள சிவகுருநாதபுரத்தை சேர்ந்த வைகுண்டராமன் (வயது 30), வேல்சாமி மகன்கள் சேர்மராஜா (29), செல்வம் (31) ஆகியோர் என்பதும், சுரண்டை பகுதிகளில் இருந்து கேரளாவுக்கு ரேஷன் அரிசியை கடத்தி சென்றதும் தெரியவந்தது. உடனே போலீசார் வைகுண்டராமன் உள்ளிட்ட 3 பேரையும் கைது செய்து, அரிசியையும் சரக்கு வேனை பறிமுதல் செய்து, தென்காசி மாவட்ட குடிமை பொருட்கள் கடத்தல் தடுப்பு பிரிவு சப்- இன்ஸ்பெக்டர் மகேஷ்வரனிடம் ஒப்படைத்தனர்.