ஓட்டல், தியேட்டர், வணிக வளாக ஊழியர்கள் 2 டோஸ் கொரோனா தடுப்பூசி போட்டிருப்பது கட்டாயம்

பெங்களூரு: பெங்களூருவில் ஓட்டல்கள், தியேட்டர்கள், வணிக வளாகங்களில் பணியாற்றி வரும் ஊழியர்கள் 2 டோஸ் கொரோனா தடுப்பூசி போட்டிருப்பது கட்டாயம் என்று மாநகராட்சி தலைமை கமிஷனர் கவுரவ் குப்தா கூறினார்.

பெங்களூருவில் நேற்று மாநகராட்சி தலைமை கமிஷனர் கவுரவ் குப்தா நிருபர்களுக்கு அளித்த பேட்டியின் போது கூறியதாவது:-

பெங்களூருவில் கொரோனா பரவலை தடுக்க வணிக வளாகங்கள், ஓட்டல்கள், தியேட்டர்களில் பணியாற்றுபவர்களுக்கு 2 டோஸ் தடுப்பூசி கட்டாயமாக்கப்பட்டுள்ளது. அரசின் விதிமுறைகளை கட்டாயமாக வணிக வளாகங்கள், தியேட்டர்கள் பின்பற்ற வேண்டும். 

பெங்களூருவில் இதுவரை 90 சதவீதம் பேர் முதற்கட்ட கொரோனா தடுப்பூசி போட்டு கொண்டுள்ளனர். 2-வது டோஸ் தடுப்பூசியை 66 சதவீதம் பேர் செலுத்தி உள்ளனர். கூடிய விரைவில் 70 முதல் 75 சதவீதமாக உயரும் என்று எதிர்பார்க்கப்படுகிறது.

ஒவ்வொருவரும் தடுப்பூசி போட்டுக் கொள்ள வேண்டும். ஒமைக்ரான் வைரஸ் பரவுவதை தடுக்க பெங்களூருவில் அனைத்து விதமான நடவடிக்கைகளும் எடுக்கப்பட்டுள்ளது. ஒமைக்ரான் வைரஸ் பாதிப்புக்கு உள்ளான 2 பேருடன், 200 பேர் நேரடியாகவும், மறைமுகமாகவும் தொடர்பில் இருந்தது தெரியவந்துள்ளது.

அவர்கள் 200 பேரும் தனிமைப்படுத்தப்பட்டு மாநகராட்சியின் கண்காணிப்பில் உள்ளனர். தென் ஆப்பிரிக்கா உள்ளிட்ட பிற ஆப்பிரிக்க நாடுகளில் இருந்து வந்த 10 பேர் தலைமறைவாகி இருந்தனர். அவர்களில் 9 பேர் தற்போது மாநகராட்சியின் தொடா்பில் உள்ளனர். அவர்களை தனிமைப்படுத்தவும், அவர்களுடன் தொடர்பில் இருந்தவர்களை தனிமைப்படுத்தவும் நடவடிக்கை எடுக்கப்பட்டுள்ளது. தேவையில்லாமல் பரவும் வதந்திகளை யாரும் நம்ப வேண்டாம்.

இவ்வாறு கவுரவ் குப்தா கூறினார்.