‘தினத்தந்தி‘ புகார் பெட்டி: மக்கள் குறைகள் தொடர்பான பதிவுகள்

செங்கல்பட்டு மாவட்டம் வண்டலூர் தாலுகா கன்னிவாக்கம் கிராமத்தில் உள்ள அடுக்குமாடி குடியிருப்பு டி-பிளாக் அருகில் உள்ள மின்கம்பத்தின் மேற்பகுதி மிகவும் ஆபத்தாக இருப்பது குறித்து ‘தினத்தந்தி’ புகார் பெட்டியில் படத்துடன் செய்தி வெளியானது. இதையடுத்து மின்வாரிய அதிகாரிகள் உடனடியாக நடவடிக்கை எடுத்துள்ளனர். சேதம் அடைந்த பகுதி வெல்டிங் மூலம் இணைக்கப்பட்டுள்ளது. இதனால் அபாயம் நீங்கியதால் அப்பகுதி மக்கள் மகிழ்ச்சி அடைந்துள்ளனர். மின்வாரிய அதிகாரிகள், ஊழியர்களுக்கும், தினத்தந்திக்கும் நன்றி தெரிவித்துள்ளனர்.

சென்னை கொரட்டூர் அன்புநகர் வாட்டர் கெனால் ரோட்டில் உள்ள மின்கம்பத்தின் மேற்பகுதி சிமெண்டு பூச்சுகள் பெயர்ந்து கம்பிகள் வெளியே தெரிகின்றன. எனவே இந்த மின்கம்பத்தின் உறுதித்தன்மையை ஆராய்ந்து உரிய நடவடிக்கை எடுக்க வேண்டும்.

- அன்புநகர் குடியிருப்போர் நல சங்கம்.

சென்னை பாரிமுனையில் இருந்து வெள்ளவேடு நோக்கி இயக்கப்படும் சாதாரண கட்டண பஸ்கள் (வழித்தட எண்: 54L, 54G) திருவள்ளூர் வரை நீட்டிக்கப்பட வேண்டும். இதன்மூலம் சென்னை-திருவள்ளூர் இடையே வேலை பார்க்க செல்லும் ஏராளமான கூலி தொழிலாளிகள் பயனடைவார்கள். ஏனெனில் திருவள்ளூரில் இருந்து இயக்கப்படும் பஸ்கள் அனைத்தும் டீலக்ஸ் பஸ்கள் ஆகும். இதில் கட்டணமும் அதிகமாக உள்ளதால் சற்று சிரமமாக இருக்கிறது.

- பயணிகள்.

காஞ்சீபுரம் மாவட்டத்தில் உள்ள 6 வழி சாலைகளில் வண்டலூர், வாலாஜாபாத் சாலை முக்கியமான சாலை ஆகும். இந்த சாலையில் படப்பை, ஒரகடம், பண்ரூட்டி ஆகிய பகுதிகளில், வாகன ஓட்டிகள் உயிருக்கு அச்சுறுத்தல் ஏற்படுத்தும் வகையில் பள்ளங்கள் வருடக் கணக்கில் இருக்கிறது. மேலும் இந்த பள்ளத்தில் மழைநீரும் குளம் போன்று தேங்குகிறது. எனவே மாவட்ட கலெக்டர் உரிய நடவடிக்கைக்கு உத்தரவிட வேண்டும் என்று கோரிக்கை விடுக்கிறோம்.

- வாகன ஓட்டிகள்.