படுகை அணை காவிரியாற்றில் விவசாயி உடல் போலீசார் விசாரணை

பரமத்திவேலூர்:

ஜேடர்பாளையம் படுகை அணை பகுதி காவிரியாற்றில் 65 வயது மதிக்கத்தக்க முதியவர் உடல் கரை ஒதுங்கி இருப்பதாக ஜேடர்பாளையம் போலீசாருக்கு தகவல் கிடைத்தது. அதன்ேபரில் அங்கு சென்ற போலீசார் முதியவரின் உடலை மீட்டு விசாரணை நடத்தினர். 

விசாரணையில் அவர் ஈரோடு மாவட்டம் ஆனைக்கல்பாளையத்தை சேர்ந்த விவசாயி திருமலை (வயது 65) என்பது தெரியவந்தது. மேலும் அவர் குடும்ப பிரச்சினை காரணமாக கடந்த 3-ம் தேதி கோபித்து கொண்டு வீட்டை விட்டு வெளியே சென்றவர் பின்னர் வீடு திரும்பவில்லை. இதுகுறித்து அவரது குடும்பத்தினர் ஈரோடு மாவட்டம், மொடக்குறிச்சி போலீஸ் நிலையத்தில் காணாமல் போன திருமலையை கண்டு பிடித்து தருமாறு புகார் அளித்திருந்ததும் தெரியவந்தது.

இதனையடுத்து ஜேடர்பாளையம் போலீசார் மொடக்குறிச்சி போலீஸ் நிலையத்திற்கு தகவல் தெரிவித்துள்ளனர். அதன்பேரில் ஜேடர்பாளையம் வந்த மொடக்குறிச்சி போலீசார் மற்றும் திருமலை குடும்பத்தினர் பிணமாக மீட்கப்பட்ட முதியவர் கடந்த 3-ம் தேதி காணாமல் போன திருமலை என்பதை உறுதிப்படுத்தினர். அதனை தொடர்ந்து ஜேடர்பாளையம் போலீசார் அவரது உடலை மீட்டு பரமத்திவேலூர் அரசு மருத்துவமனையில் பிரேத பரிசோதனைக்காக சேர்த்தனர். மேலும் இதுகுறித்து போலீசார் வழக்குப்பதிவு செய்து விவசாயியின் இறப்புக்கான காரணம் குறித்து விசாரணை நடத்தி வருகின்றனர்.