ராமநாதபுரம் பெரிய கண்மாய் நிரம்பியது

வைகை அணையில் இருந்து திறந்துவிடப்பட்ட தண்ணீர் ராமநாதபுரம் மாவட்டம் பார்த்திபனூர் மதகு அணையில் இருந்து இடது, வலது பிரதான கால்வாய்களுக்கும் ராமநாதபுரம் பெரிய கண்மாய்க்கும் பிரித்து விடப்பட்டுள்ளது. இந்த வெள்ள நீர் சீறிப்பாய்ந்து ராமநாதபுரத்தை வந்தடைந்துள்ளது. சீராக வந்து கொண்டிருந்த தண்ணீர் திடீரென்று உயர்ந்ததால் கடந்த சில நாட்களுக்கு முன்னர் ராமநாதபுரம் அருகே காவனூர், காருகுடி, தொருவளுர் உள்ளிட்ட பல கிராமங்களை வெள்ளம் சூழ்ந்தது. கிராமங்களை சூழ்ந்த வெள்ளநீர் வேகம் குறைந்துள்ள நிலையிலும் கிராமங்களில் தண்ணீர் இன்னும் தேங்கியபடியே உள்ளது.
ராமநாதபுரம் பெரிய கண்மாயில் இருந்து மதுரை தேசிய நெடுஞ்சாலையில் அமைந்துள்ள தென்கலுங்கு வழியாக முதல்கட்டமாக 250 கனஅடி தண்ணீர் வெளியேற்றப்பட்டு வருகிறது. இந்த தண்ணீர் அருகில் உள்ள சக்கரக்கோட்டை கண்மாய்க்குள் விடப்பட்டுள்ளது. சக்கரக்கோட்டை கண்மாயும் அதன் முழு கொள்ளளவை எட்டி உள்ளதால் கலுங்கு மடை வழியாக வெளியேறி தானாக கடலுக்கு சென்றுவிடும்.
பெரிய கண்மாய், சக்கரக்கோட்டை கண்மாயை சுற்றி உள்ள பகுதி மக்களுக்கு வெள்ள அபாய எச்சரிக்கை விடப்பட்டு உள்ளது. ஆர்.எஸ்.மடை ஊராட்சி சார்பில் பொதுமக்களுக்கு ஒலிபெருக்கி மூலம் வெள்ள அபாயம் குறித்து அறிவிக்கப்பட்டது. கடந்த 10 ஆண்டுகளுக்கு பிறகு பெருவெள்ளம் ஏற்பட்டு மழைநீரும் வைகை தண்ணீரும் தேக்க வழியின்றி காருகுடி வழியாகவும், பெரிய கண்மாய் வழியாகவும் கடலுக்கு திறந்து விடப்பட்டுள்ளது குறிப்பிடத்தக்கது.