<
அரசு பஸ்சை சிறைபிடித்து மாணவர்கள் போராட்டம்
வேட்டவலம் அருகே பள்ளி நேரத்தில் நிற்காமல் சென்ற அரசு பஸ்சை மாணவர்கள் சிறைபிடித்து போராட்டத்தில் ஈடுபட்டனர்
வேட்டவலம்
வேட்டவலம் அருகே பள்ளி நேரத்தில் நிற்காமல் சென்ற அரசு பஸ்சை மாணவர்கள் சிறைபிடித்து போராட்டத்தில் ஈடுபட்டனர்.
நிற்காமல் சென்ற அரசு பஸ்
திருவண்ணாமலை மாவட்டம் வேட்டவலம் மற்றும் அதை சுற்றியுள்ள கிராமங்களிலிருந்து சுமார் 2 ஆயிரத்திற்கும் மேற்பட்ட மாணவ- மாணவிகள் வேட்டவலம் அரசினர் மேல்நிலைப்பள்ளி, அரசினர் பெண்கள் மேல்நிலைப்பள்ளி உள்ளிட்ட பல்வேறு பள்ளிகளில் படித்து வருகின்றனர்.
இந்தநிலையில் திருக்கோவிலூர் -வேட்டவலம் வழித்தடத்தில் உள்ள வைப்பூர், தண்டரை, அகரம் மற்றும் சுற்றியுள்ள கிராமங்களில் இருந்து சுமார் 100-க்கும் மேற்பட்ட மாணவர்கள் திருக்கோவிலூரில் இருந்து வேட்டவலத்திற்கு காலை 9 மணியளவில் வரும் அரசு பஸ்சில் பயணம் செய்து வருகின்றனர்.
இந்த பஸ் வைப்பூர் கிராமத்திற்கு வரும்போதே பஸ்சில் கூட்டம் அதிகமாக இருப்பதால் கடந்த சில நாட்களாக வைப்பூர் கிராமத்தில் பஸ்சை நிறுத்தி மாணவர்களை ஏற்றி செல்வதில்லை.
இதற்காக பஸ்சை பஸ் நிறுத்தத்தில் நிறுத்தாமல் சற்று தள்ளி நிறுத்துகின்றனர். இதனால் மாணவர்கள் ஓடிச்சென்று பஸ்சில் ஏறுகின்றனர். இதனால் சிறு சிறு விபத்துகள் ஏற்பட்டு மாணவர்கள் பாதிப்பிற்கு உள்ளாகின்றனர்.
சிறைபிடிப்பு
இந்த நிலையில் நேற்று காலை 9 மணி அளவில் அந்த அரசு பஸ் வழக்கம்போல் வைப்பூரில் நிற்காமல் சென்றதால் ஆத்திரம் அடைந்த மாணவர்கள் பஸ்சை சிறைபிடித்தனர்.
இது குறித்து தகவலறிந்த வேட்டவலம் போலீஸ் சப்- இன்ஸ்பெக்டர்கள் சுப்பிரமணி, தனசேகர், காமராஜ் மற்றும் போக்குவரத்து துறையினர் சம்பவ இடத்திற்கு விரைந்து சென்று போராட்டத்தில் ஈடுபட்ட மாணவர்களுடன் பேச்சுவார்த்தை நடத்தினர்.
அப்போது மாணவர்கள் பள்ளிக்கு செல்ல இதே நேரத்தில் கூடுதல் பஸ் இயக்க வேண்டும் என கோரிக்கை விடுத்தனர்.
மாணவர்களின் கோரிக்கை மீது உடனடியாக நடவடிக்கை எடுப்பதாக உறுதி அளித்ததை அடுத்து மாணவர்கள் தங்கள் போராட்டத்தை கைவிட்டனர்.
இந்த போராட்டம் காரணமாக சுமார் ஒரு மணி நேரம் போக்குவரத்து பாதிக்கப்பட்டது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
