பெண் என்ஜினீயர் தற்கொலை வழக்கில் அவரை காதலித்து ஏமாற்றிய ஆசிரியர் கைது

ராமநாதபுரம்

ராமநாதபுரம் பெண் என்ஜினீயர் தற்கொலை வழக்கில் அவரை காதலித்து ஏமாற்றிய ஆசிரியர் கைது செய்யப்பட்டார். விசாரணையில் அவர் வேறு பெண்ணை திருமணம் செய்திருப்பது தெரியவந்தது.

திருமணம் செய்ய மறுப்பு

ராமநாதபுரம் ஓம்சக்திநகர் 11-வது தெருவை சேர்ந்தவர், முனியசாமி. அவருடைய மகள் சவுமியா(வயது 25) பி.இ. பட்டதாரி. 

இவருடன் தனியார் பள்ளியில் ஆசிரியராக பணியாற்றி வந்த சேக்முகமது என்ற அபு(27) பழகி வந்துள்ளார். பின்னர் அவரை காதலிப்பதாக கூறியும், திருமணம் செய்து கொள்வதாக ஆசைவார்த்தை கூறியும் நெருங்கி பழகியுள்ளார். ஆனால் திருமணம் செய்து கொள்ளுமாறு கூறியபோது சேக்முகமது மறுத்துவிட்டாராம். இதனால் தன்னை ஏமாற்றி விட்டதாக சவுமியா தற்கொலைக்கு முயன்றபோது சேக்முகமதுவின் குடும்பத்தினர் திருமணம் செய்து வைப்பதாகவும், சில மாதங்கள் பொறுமையாக இருக்குமாறும் கூறியுள்ளனா். 

தற்கொலை

இதன் பின்னர் சவுமியாவிடம் ரூ.5 லட்சம் வரதட்சணை வேண்டும், 80 பவுன் நகை போடவேண்டும் என்று பல்வேறு காரணங்களை கூறி திருமணம் செய்து வைக்க சேக்முகமது பெற்றோர் மறுத்து விட்டதாக தெரிகிறது.

இந்தநிலையில் சேக்முகமதுவின் குடும்பத்தினர் திடீரென ஊரை காலி செய்துவிட்டு திருச்சிக்கு சென்றுவிட்டனராம். சேக்முகமதுவும், சவுமியாவுடனான தொடர்பை துண்டித்துக்கொண்டார்.

இதனால் தான் ஏமாற்றப்பட்டதை அறிந்த சவுமியா கடந்த 9-ந்தேதி, தனது சாவுக்கு சேக்முகமது மற்றும் அவரின் பெற்றோர், திருப்பூரில் உள்ள அவருடைய மாமா ஆகியோர்தான் காரணம் என்று கடிதம் எழுதி வைத்து விட்டு தூக்குப்போட்டு தற்கொலை செய்து கொண்டார். 

கைது

இந்த சம்பவம் தொடர்பாக தனிப்படை போலீசார் வழக்குப்பதிவு செய்து, திருச்சியில் இருந்த சேக் முகமதுவை கைது செய்து ராமநாதபுரம் அழைத்து வந்தனர். அவரிடம் நடத்திய விசாரணையில் சவுமியாவுடன் தொடர்பை துண்டித்துவிட்டு உறவுக்கார பெண் ஒருவரை கடந்த சில மாதங்களுக்கு முன்பு அவர் திருமணம் செய்து கொண்டதும், சவுமியா தொடர்ந்து  போன் செய்ததால், செல்போன் எண்ணை மாற்றியதும் தெரியவந்துள்ளது. 

ஆசிரியர் சேக்முகமது மேலும் சில பெண்களை ஏமாற்றி உள்ளதாக சவுமியா கடிதத்தில் கூறியிருப்பது தொடர்பாக போலீசார் விசாரணை மேற்கொண்டுள்ளனர். அவர் அளிக்கும் தகவலின் அடிப்படையில் அவருடைய பெற்றோர் மற்றும் மாமா உள்ளிட்டோரின் பங்கு என்ன? என தெரியவரும் என்றும், அதன் அடிப்படையில் அவர்கள் மீது நடவடிக்கை எடுக்கப்படும் என போலீசார் தரப்பில் தெரிவிக்கப்பட்டது.