குடிநீர் கேட்டு பொதுமக்கள் சாலை மறியல்

பெரம்பலூர்:

பெரம்பலூர் ஒன்றியம், வேலூர் ஊராட்சிக்கு உட்பட்ட கீழக்கணவாய் கிராமத்தில் மோட்டார் பழுது காரணமாக கடந்த சில நாட்களாக குடிநீர் வினியோகிக்கப்படவில்லை என்று கூறப்படுகிறது. இதனால் ஆத்திரமடைந்த அந்த பகுதி பொதுமக்கள் நேற்று காலை திடீரென்று பெரம்பலூர்-செட்டிகுளம் சாலையில் மறியலில் ஈடுபட்டதால் பரபரப்பு ஏற்பட்டது. இதுகுறித்து தகவல் அறிந்து விரைந்து வந்த சம்பந்தப்பட்ட அதிகாரிகள், ஊராட்சி மன்ற நிர்வாகத்தினர் பொதுமக்களிடம் பேச்சுவார்த்தை நடத்தி குடிநீர் வினியோகிக்க நடவடிக்கை எடுக்கப்படும் என்று கூறினர். இதைத்தொடர்ந்து அவர்கள் மறியலை கைவிட்டு கலைந்து சென்றனர்.