இருதரப்பினர் இடையே ஏற்பட்ட மோதலில் 2 பேர் படுகாயம்

முக்கொம்பு அருகில் உள்ள திருப்பராய்த்துறை கடைவீதியில் சனிக்கிழமையன்று நடந்த வாரச்சந்தையில் முருகன்(வயது 36) என்பவர் எலுமிச்சை பழம் கடை வைத்திருந்தார். அப்போது அவருடைய கடை முன்பு பேட்டவாய்த்தலை அருகில் உள்ள எஸ்.புதுக்கோட்டை பகுதியை சேர்ந்த கமலாநேரு(36) மற்றும் அவரது மகள் ஜான்பிரியா(20) ஆகியோர் வந்த மோட்டார் சைக்கிளை நிறுத்தியுள்ளனர். அப்போது முருகன், கடை முன்பு வாகனத்தை நிறுத்த வேண்டாம், வியாபாரம் பாதிக்கும் என்று கூறியதாக கூறப்படுகிறது. இது தொடர்பாக அவர்களுக்கு இடையே வாக்குவாதம் ஏற்பட்டது. இதில் ஆத்திரமடைந்த கமலாநேரு தனது மகன் அன்புதுரைக்கு போன் மூலம் தகவல் கொடுத்துள்ளார். இதையடுத்து தனது நண்பர்கள் சிலருடன் அங்கு அன்புதுரை வந்தார். அப்போது இருதரப்பினருக்கும் இடையே கைகலப்பு ஏற்பட்டு ஒருவரையொருவர் தாக்கிக்கொண்டு, கொலை மிரட்டல் விடுத்து சென்றதாக தெரிகிறது. இந்த சம்பவத்தில் பலத்த காயமடைந்த முருகன், அவரது நண்பர் சரவணமூர்த்தி(48) ஆகியோர் பேட்டவாய்த்தலையில் உள்ள தனியார் மருத்துவமணையில் சிகிச்சை பெற்று வருகின்றனர். 

இந்த சம்பவம் தொடர்பாக முருகன் கொடுத்த புகாரின் அடிப்படையில் கமலாநேரு, ஜான்பிரியா, எலமனூரை சேர்ந்த தியாகராஜன்(20), விக்னேஷ்(22), 18 வயது சிறுவன் மற்றும் சிலர் மீதும், கமலாநேரு கொடுத்த புகாரின் அடிப்படையில் முருகன், சரவணமூர்த்தி ஆகியோர் மீதும்  வழக்குப்பதிவு செய்து ஜீயபுரம் போலீசார் விசாரணை நடத்தி வருகின்றனர். மேலும் விக்னேசை கைது செய்துள்ளனர்.