கயத்தாறு அருகே மது விற்ற 2 பேர் கைது

கயத்தாறு அருகே மது விற்ற 2 பேரை போலீசார் கைது செய்தனர். அவர்களிடம் இருந்து 57 மதுபாட்டில்கள் பறிமுதல் செய்யப்பட்டன.

கயத்தாறு பகுதியில் போலீஸ் சப்-இன்ஸ்பெக்டர்கள்  தலைமையில் 2 தனிப்படை போலீசார் ரோந்து பணியில் ஈடுபட்டு இருந்தனர்.

கயத்தாறு அருகிலுள்ள நாகலாபுரம் பகுதியில் சந்தேகத்திற்கு இடமான முறையில் நின்று கொண்டிருந்தவரை சப்-இன்ஸ்பெக்டர் சுப்புராமகிருஷ்ணன் மற்றும் போலீசார்  பிடித்து விசாரித்தனர். அவர் நெல்லை மாவட்டம் மானூர் அருகிலுள்ள தடியம்பட்டி கிராமம் பிள்ளையார் கோவில் தெருவைச் சேர்ந்த கணியன் மகன் தங்கமணி (வயது 39), என்றும் அவர், அப்பகுதியில் மது பாட்டில்களை பதுக்கி வைத்து விற்பனை செய்து வந்ததும் தெரிய வந்தது. அவரிடம் இருந்த 30 மதுபாட்டில்களை போலீசார் பறிமுதல் செய்தனர். இதுகுறித்து கயத்தாறு போலீசார் வழக்குப்பதிவு செய்து தங்கமணியை கைது ெசய்தனர்.

 இதேபோன்று  தெற்கு இலந்தைகுளம் பஸ் ஸ்டாப் அருகே சந்தேகத்திற்கு இடமான முறையில் நின்று கொண்டிருந்தவரை போலீஸ் சப்-இன்ஸ்பெக்டர் பால் தலைமையிலான போலீசார் பிடித்து விசாரித்தனர். அவர் நெல்லை மாவட்டம் மானூர் அருகிலுள்ள தடியம்பட்டி காலனி தெருவைச் சேர்ந்த சண்முகம் மகன் செந்தூர்பாண்டி(50), என்பதும், இவர் அப்பகுதியில் மது விற்று வந்ததும் தெரிய வந்தது. அவரிடம் இருந்து 27 மது பாட்டில்களை போலீசார் பறிமுதல் செய்தனர். இதுகுறித்து கயத்தாறு போலீசார் வழக்குப்பதிவு செய்து செந்தூர்பாண்டியை கைது செய்தனர்.