நீண்ட நாட்களாக தலைமறைவாக இருந்த 2 போலீசார் சரண்

மதுரையை சேர்ந்தவர் ராமானுஜன். இவருடைய மகன் வெங்கடேசன் (வயது 26). திருட்டு வழக்கு தொடர்பாக கடந்த 2012-ம் ஆண்டு அக்டோபர் 2-ந் தேதி பரமக்குடி எமனேசுவரம் போலீஸ் நிலையத்திற்கு அழைத்துவரப்பட்ட இவர், போலீசார் தாக்கியதில் இறந்ததாக புகார் கூறப்பட்டது.
மேலும், இந்த வழக்கு தொடர்பாக சி.பி.சி.ஐ.டி. போலீசார் நயினார்கோவில் போலீஸ் நிலையத்தில் பணியாற்றி வந்த தலைமை ஏட்டு பரமக்குடி ஞானசேகரன், முதுகுளத்தூர் தனிப்பிரிவு போலீஸ்காரர் மஞ்சூரை சேர்ந்த கிருஷ்ணவேல் மற்றும் சாயல்குடி தனிப்பிரிவு போலீஸ்காரரான ஆப்பநாட்டை சேர்ந்த கோதண்டராமன் ஆகியோரை தேடி வந்தனர். நீண்ட நாட்களாக 3 பேரும் தலைமறைவாக இருந்து வந்தனர்.
அவர்கள் அந்தமானுக்கு சென்றுவிட்டதாக கூறப்பட்டு வந்த நிலையில் நேற்று காலை ஞானசேகரன், கிருஷ்ணவேல் ஆகியோர் ராமநாதபுரம் கோர்ட்டில் சரண் அடைந்தனர். அவர்களிடம் விசாரணை நடத்திய நீதிபதி சிட்டிபாபு வருகிற 27-ந் தேதி வரை சிறையில் அடைக்க உத்தரவிட்டார். இதனை தொடர்ந்து 2 பேரும் மருத்துவ பரிசோதனைக்காக ராமநாதபுரம் அரசு ஆஸ்பத்திரிக்கு அழைத்து வரப்பட்டனர்.
இந்த வழக்கில் இன்னும் தலைமறைவாக உள்ள போலீஸ்காரர் கோதண்டராமனை சி.பி.சி.ஐ.டி போலீசார் தேடிவருகின்றனர்.