வேடசந்தூர் அருகே கார் மோதி 2 வாலிபர்கள் காயம் உறவினர்கள் சாலைமறியல்

வேடசந்தூர்:

வேடசந்தூர் அருகே உள்ள எரியோட்டை சேர்ந்தவர்கள் மணிமாறன் (வயது 24), முத்துகிருஷ்ணன் (27). இவர்கள் மோட்டார்சைக்கிளில் பூத்தாம்பட்டிக்கு வந்துவிட்டு மீண்டும் எரியோடு செல்வதற்காக நேற்று காலை தண்ணீர்பந்தம்பட்டி அருகே வந்து ெகாண்டு இருந்தனர். அப்போது பின்னால் வேடசந்தூரில் இருந்து வடமதுரை நோக்கி சென்ற ஒரு கார் மோட்டார்சைக்கிள் மீது மோதியது.

இதில் மணிமாறன், முத்துக்கிருஷ்ணன் ஆகியோர் காயம் அடைந்தனர். இதையடுத்து அவர்கள் 108 ஆம்புலன்ஸ் மூலம் வேடசந்தூர் அரசு மருத்துவமனையில் சேர்க்கப்பட்டு சிகிச்சை பெற்று வருகிறார்கள்.

இதனிடையே கார் டிரைவரை உடனடியாக கைது செய்ய வலியுறுத்தி காயமடைந்த வாலிபர்களின் உறவினர்கள் எரியோடு பஸ் நிலையம் அருகே சாலைமறியல் போராட்டம் நடத்தினார்கள். இதனால் திண்டுக்கல்-கரூர் சாலையில் போக்குவரத்து பாதித்தது. இதுகுறித்து தகவல் கிடைத்ததும் எரியோடு போலீஸ் இன்ஸ்பெக்டர் சத்தியபிரபா மற்றும் போலீசார் விரைந்து சென்று மறியல் செய்தவர்களிடம் பேச்சுவார்த்தை நடத்தி அவர்களை கலைய செய்தனர். இதனிடையே கார் டிரைவரான சேலம் மாவட்டம் தேவூரை சேர்ந்த பாலாஜியை(22) போலீசார் கைது செய்தனர். இதனால் எரியோட்டில் பரபரப்பு ஏற்பட்டது.