<
சுடுகாட்டில் புதைத்து வைத்திருந்த 16 கிலோ தங்க, வைர நகைகள் மீட்பு. கட்டிட தொழிலாளி கைது
வேலூர் நகைக்கடையில் முகமூடி அணிந்து கொள்ளையடித்த கட்டிட தொழிலாளி கைது செய்யப்பட்டார். அவர் சுடுகாட்டில் புதைத்து வைத்திருந்த 16 கிலோ தங்க, வைர நகைகள் மீட்கப்பட்டன.
அணைக்கட்டு
வேலூர் நகைக்கடையில் முகமூடி அணிந்து கொள்ளையடித்த கட்டிட தொழிலாளி கைது செய்யப்பட்டார். அவர் சுடுகாட்டில் புதைத்து வைத்திருந்த 16 கிலோ தங்க, வைர நகைகள் மீட்கப்பட்டன.
நகைகள் கொள்ளை
வேலூர் -காட்பாடி சாலையில் தோட்டப்பாளையத்தில் உள்ள ஜோஸ் ஆலுக்காஸ் நகைக்கடையில் கடந்த 15-ந் தேதி மர்மநபர் சுவரில் துளைபோட்டு உள்ளே சென்று சுமார் 16 கிலோ தங்க, வைர நகைகளை கொள்ளையடித்துச் சென்றார். உள்ளே புகுந்த மர்மநபர் சிங்க படம் கொண்ட முகமூடி, தலையில் விக் அணிந்திருந்தார். இந்த கொள்ளை சம்பவம் வேலூரில் பெரும் பரபரப்பை ஏற்படுத்தியது.
இது தொடர்பாக வடக்கு மண்டல ஐ.ஜி. சந்தோஷ் குமார், வேலூர் சரக டி.ஜ.ஜி. ஏ.ஜி.பாபு, வேலூர் மாவட்ட போலீஸ் சூப்பிரண்டு ராஜேஷ்கண்ணன் மற்றும் போலீசார் கடையில் விசாரணை மேற்கொண்டனர். கொள்ளையனை கைது செய்ய 4 துணை போலீஸ் சூப்பிரண்டுகள் தலைமையில் 8 தனிப்படைகள் அமைக்கப்பட்டது. இந்த தனிப்படை போலீசார் பல்வேறு கோணங்களில் விசாரணை நடத்தி வந்தனர்.
கட்டிட தொழிலாளி கைது
அதில் நகைக்கடையில் கொள்ளையடித்தது அணைக்கட்டு தாலுகா பள்ளிகொண்டா போலீஸ் நிலையத்துக்கு உட்பட்ட குச்சிபாளையம் கிராமத்தை சேர்ந்த விஜயகுமார் என்பவரது மகன் டீக்காராமன் (வயது 23) என்பது தெரியவந்தது. அவரை போலீசார் பிடித்து கைது செய்து நகைகளை மீட்டனர்.
இதுகுறித்து போலீசார் கூறியதாவது:-
கைதான டீக்காராமன் கட்டிட தொழிலாளி. விஜயகுமார் தெரு ஓரங்களில் உள்ள பிளாஸ்டிக் பாட்டில்கள், பிளாஸ்டிக் பைகளையும் எடுத்து அதை விற்று குடும்பம் நடத்தி வருகிறார். டீக்காராமன் சிறு வயதில் இருந்தே சிறு, சிறு திருட்டு சம்பவங்களில் ஈடுபட்டு வந்துள்ளார். அவர் தனக்கென நண்பர்கள் வட்டத்தை உருவாக்காமல் தன்னந்தனியே பல்வேறு இடங்களுக்கு சென்று திருடி வந்துள்ளார்.
கடந்த 15-ந் தேதி வேலூரில் உள்ள பிரபல நகைக்கடையான ஜோஸ் ஆலுக்காசில் சுமார் 16 கிலோ தங்க நகைகள் கொள்ளையடித்துள்ளார்.
உடல்மொழியை வைத்து....
இந்த நிலையில் நகைக்கடையில் முகமூடி அணிந்து கொள்ளையடித்த புகைப்படம் சமூக வலைத்தளங்களில் வைரலாக பரவியது. அப்போது பள்ளிகொண்டா போலீஸ் நிலையத்தைச் சேர்ந்த சப்-இன்ஸ்பெக்டர் கண்ணன் மற்றும் போலீஸ்காரர் விநாயகம் ஆகியோர் அதை பார்த்துள்ளனர்.
கடந்த ஆகஸ்டு மாதம் பள்ளிகொண்டா தனியார் மெட்ரிக் மேல்நிலைப்பள்ளியில் கொத்தனார் வேலை செய்தபோது அங்கு லேப்-டாப் திருடிய டீக்காராமனின் உடல்மொழி போன்று அவர்களுக்கு தெரிந்தது.
இதுகுறித்து அவர்கள் விசாரணை செய்தபோது நகைக்கடையில் கொள்ளையடித்தது டீக்காராமனாகத்தான் இருக்கும் என்று 90 சதவீதம் அவர்கள் ஊர்ஜிதம் செய்தனர்.
அதன்அடிப்படையில் தனிப்படை பிரிவு போலீசாருக்கு அவர்கள் தகவல் கொடுத்தனர். அதன்பேரில் போலீசார் குச்சிபாளையம் கிராமத்திற்கு வந்து டீக்காராமன் குறித்து விசாரணை நடத்தினர்.
அப்போது அப்பகுதி மக்கள் கடந்த ஒரு வாரமாக அவன் இந்தப் பகுதியில் இல்லை என்றும், ஒடுகத்தூரில் உள்ள ஒரு வாடகை வீட்டில் தங்கி இருப்பதாகவும் தெரிவித்தனர்.
வாடகைக்கு வீடு
இதனையடுத்து ஒடுகத்தூர் பகுதியில் நோட்டமிட்ட போலீசார் கடந்த 18-ந் தேதி (சனிக்கிழமை) இரவு வாடகை வீட்டில் தங்கி இருந்த டீக்காராமனை பிடித்து விசாரணை மேற்கொண்டனர். விசாரணையில் அவர் ஒடுகத்தூர் பகுதியில் வீட்டை வாடகைக்கு எடுத்து, அதற்காக ரூ.4 ஆயிரம் வாடகை கொடுத்துள்ளார். மேலும், நகைக்கடையில் திருடியதும், அதை ஒடுகத்தூர் உத்திரகாவேரி ஆற்றங்கரையோரம் உள்ள சுடுகாட்டில் பதுக்கி வைத்ததையும் ஒப்புக்கொண்டார். கொள்ளையடித்த அன்று இரவே அந்த வீட்டில் சென்று தங்கியுள்ளார்.
இவ்வாறு அவர்கள் கூறினர்.
நகைகள் தோண்டி எடுப்பு
இதையடுத்து நேற்று மாவட்ட போலீஸ் சூப்பிரண்டு ராஜேஷ்கண்ணன், உதவி போலீஸ் சூப்பிரண்டு ஆல்பர்ட்ஜான், வேலூர் வடக்கு இன்ஸ்பெக்டர் செந்தில்குமார் மற்றும் 100-க்கும் மேற்பட்ட போலீசார் நகை புதைத்து வைக்கப்பட்டிருந்த சுடுகாட்டு பகுதிக்கு சென்றனர். உடன் டீக்காராமனையும் அழைத்துச் சென்றனர். அங்கு அவர், நகைகளை புதைத்த இடங்களை அடையாளம் காட்டினார். இதனிடையே அந்த பகுதியை வெடிகுண்டு நிபுணர்கள் சோதனை செய்தனர். அடையாளம் காட்டப்பட்ட இடத்தை போலீசார் தோண்டினர்.
ஒரு இடத்தில் சுமார் 10 கிலோ நகைகள் பிளாஸ்டிக் பையில் இருந்தது. அதன் அருகே மற்றொரு இடத்தில் சுமார் 6 கிலோ நகைகளும் இருந்தது. தோண்டி மீட்கப்பட்ட நகைகளில் விலை விவர அட்டைகளும் இருந்தது. பின்னர் அவற்றை கைப்பற்றி போலீசார் எடுத்துச் சென்றனர். மேலும் டீக்காராமனையும் கருப்பு துணியால் முகத்தை மூடியவாறு போலீசார் மேல்விசாரனைக்காக அழைத்துச் சென்றனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire