நடுரோட்டில் தீக்குளிக்க முயன்ற சமையல் தொழிலாளி கைது

சென்னை அமைந்தகரையைச் சேர்ந்தவர் சபி (வயது 27). சமையல் தொழிலாளியான இவர், நேற்று காலை மோட்டார் சைக்கிளில் கீழ்ப்பாக்கம், ஈ.வெ.ரா.பெரியார் நெடுஞ்சாலையில் சென்று கொண்டிருந்தார். அப்போது அங்கு போக்குவரத்து போலீஸ் சப்-இன்ஸ்பெக்டர் நாராயணமூர்த்தி வாகன சோதனையில் ஈடுபட்டிருந்தார். அவர், மோட்டார் சைக்கிளில் சென்ற சபியை மடக்கி சோதனை செய்தார்.

சபி குடிபோதையில் இருக்கிறாரா? என்பதை சோதிக்க அவரை சப்-இன்ஸ்பெக்டர் நாராயணமூர்த்தி சாலை ஓரம் அழைத்துச்சென்றார். உடனே அவரிடம் இருந்து தப்பிச்சென்ற சபி, அருகில் உள்ள பெட்ரோல் நிலையத்துக்கு சென்று 100 ரூபாய்க்கு பெட்ரோல் வாங்கி தலையில் ஊற்றி நடுரோட்டில் தீக்குளிக்க முயன்றதாக தெரிகிறது.

அவரை தீக்குளிக்க விடாமல் காப்பாற்றிய சப்-இன்ஸ்பெக்டர் நாராயணமூர்த்தி, சபியை டி.பி.சத்திரம் போலீஸ் நிலையத்தில் ஒப்படைத்தார். அவர் மீது உரிய நடவடிக்கை எடுக்க வேண்டி புகார் மனுவும் கொடுக்கப்பட்டது. அதன்பேரில் தற்கொலை முயற்சி உள்ளிட்ட 5 சட்டப்பிரிவுகளில் வழக்குப்பதிவு செய்த டி.பி.சத்திரம் போலீசார், சபியை நேற்று இரவு கைது செய்தனர்.