<
தேவாலயங்களில் சிறப்பு பிரார்த்தனை
2022-ம் ஆண்டு ஆங்கிலப் புத்தாண்டு பிறந்ததையொட்டி தேவாலயங்களில் சிறப்பு பிரார்த்தனை நடந்தது. இதில் திரளான கிறிஸ்தவர்கள் பங்கேற்றனர்.
தஞ்சாவூர்:
2022-ம் ஆண்டு ஆங்கிலப் புத்தாண்டு பிறந்ததையொட்டி தேவாலயங்களில் சிறப்பு பிரார்த்தனை நடந்தது. இதில் திரளான கிறிஸ்தவர்கள் பங்கேற்றனர்.
சி.எஸ்.ஐ. கிறிஸ்துநாதர் ஆலயம்
2021-ம் ஆண்டு நிறைவடைந்து நேற்று நள்ளிரவு 12 மணிக்கு 2022-ம் ஆண்டு ஆங்கிலப்புத்தாண்டு பிறந்தது. புத்தாண்டு பிறப்பையொட்டி தஞ்சை மாவட்டத்தில் உள்ள தேவாலயங்களில் சிறப்பு பிரார்த்தனை நடந்தது.
தஞ்சை சிவகங்கை பூங்கா அருகே உள்ள கோட்டை சி.எஸ்.ஐ. கிறிஸ்துநாதர் ஆலயத்தில் நேற்றுஇரவு புத்தாண்டு சிறப்பு ஆராதனை நடந்தது. இரவு 11.30 மணிக்கு 2021-ம் ஆண்டு இறைவன் செய்த நன்மைகளுக்கு நன்றி தெரிவிக்கும் வகையில் ஆராதனை நடந்தது. நள்ளிரவு 12 மணிக்கு 2022-ம் புதிய ஆண்டில் கடவுளுடைய வழி நடத்துதலுக்காக சிறப்பு ஆராதனை நடந்தது. இந்த ஆராதனையை சேகரத் தலைவர் பிரைட் பிராங்கிளின் நடத்தி, சிறப்பு செய்தி அளித்தார்.
ஆராதனை முடிந்தவுடன் அனைவருக்கும் கேக் மற்றும் தேநீர் வழங்கப்பட்டது. இதில் திருச்சபை மக்கள் கலந்து கொண்டனர். இதற்கான அனைத்து ஏற்பாடுகளையும் சேகர குழு உறுப்பினர்கள் செய்து இருந்தனர். புத்தாண்டையொட்டி ஆலயம் வண்ண மின்விளக்குகளால் அலங்கரிக்கப்பட்டிருந்தது. முன்னதாக கொரோனா தடுப்பு நடவடிக்கையாக ஆராதனையில் பங்கேற்றவர்கள் கைகளில் கிருமிநாசினி தெளிக்கப்பட்டது.
தூய பேதுரு ஆலயம்
தஞ்சை மானம்புச்சாவடியில் உள்ள சி.எஸ்.ஐ. தூய பேதுரு ஆலயத்தில் புத்தாண்டு சிறப்பு ஆராதனை பொறுப்பு ஆயர் ஜேம்ஸ் பால் தலைமையில் நடந்தது. புத்தாண்டு பிறந்தவுடன் ஆலய மணி ஒலிக்கப்பட்டது. இதில் திரளான கிறிஸ்தவர்கள் பங்கேற்றனர்.
புனித அடைக்கல மாதா ஆலயம்
தஞ்சை புதுக்கோட்டை சாலையில் உள்ள புனித அடைக்கல மாதா ஆலயத்தில் நேற்றுஇரவு புத்தாண்டு சிறப்பு திருப்பலி நடந்தது. 2021-ம் ஆண்டு முழுவதும் இறைவன் செய்த அனைத்து நன்மையான காரியங்களுக்காக நன்றி வழிபாட்டுடன் கூட்டுத்திருப்பலி பங்குத்தந்தை ஜெயராஜ் தலைமையில் திறந்தவெளி மைதானத்தில் நடந்தது. இதில் ஏராளமான கிறிஸ்தவர்கள் கலந்து கொண்டனர்.
குழந்தை ஏசு திருத்தலம்
தஞ்சை குழந்தை ஏசு திருத்தலத்தில் நன்றி வழிபாடு அதிபர் அம்புரோஸ் தலைமையில் நடந்தது. அதைத்தொடர்ந்து புத்தாண்டு கூட்டுத்திருப்பலி நடந்தது. இதில் ஏராளமான கிறிஸ்தவர்கள் கலந்து கொண்டனர்.
திரு இருதய பேராலயம்
தஞ்சை மேரீஸ்கார்னர் அருகே உள்ள திரு இருதய பேராலயத்தில் புத்தாண்டை முன்னிட்டு நேற்றுஇரவு நன்றி வழிபாடும், தொடர்ந்து புத்தாண்டு கூட்டு பாடல் திருப்பலியும் பங்குத்தந்தை பிரபாகரன் தலைமையில் நடந்தது. இதில் உதவி பங்குத்தந்தை அலெக்சாண்டர், பங்கு பேரவையினர், இளைஞர் மன்றத்தினர் உள்ளிட்ட கிறிஸ்தவர்கள் திரளாக கலந்து கொண்டு பிரார்த்தனை செய்தனர். இதேபோல் மாவட்டத்தில் உள்ள அனைத்து தேவாலயங்களிலும் புத்தாண்டு சிறப்பு பிராத்தனை நடந்தது.
முக கவசம்
பிரார்த்தனையில் கலந்து கொண்டவர்கள் சமூக இடைவெளியை கடைபிடித்து முககவசம் அணிந்து இருந்தனர். புத்தாண்டையொட்டி அனைத்து தேவாலயங்களிலும் வண்ண, வண்ண மின் விளக்குகளால் அலங்காரம் செய்யப்பட்டு இருந்தது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
