புத்தாண்டு பிறந்தது: கிறிஸ்தவ ஆலயங்களில் நள்ளிரவில் சிறப்பு பிரார்த்தனை

நெல்லை:

2022-ம் ஆண்டு ஆங்கில புத்தாண்டு நேற்று நள்ளிரவு பிறந்தது. இதையொட்டி கிறிஸ்தவ ஆலயங்களில் நள்ளிரவில் சிறப்பு பிரார்த்தனை நடைபெற்றது. பாளையங்கோட்டையில் உள்ள கத்தோலிக்க ஆலயங்கள், சி.எஸ்.ஐ. ஆலயங்களில் நள்ளிரவு 11-30 மணி அளவில் சிறப்பு பிரார்த்தனை தொடங்கியது. 12 மணிக்கு புத்தாண்டு பிறந்ததும், ஒருவருக்கொருவர் புத்தாண்டு வாழ்த்துக்களை பகிர்ந்து கொண்டனர். பாளையங்கோட்டை சீவலப்பேரி ரோடு அந்தோணியார் ஆலயத்தில் முன்னாள் பிஷப் ஜூடு பால்ராஜ் தலைமையில் புத்தாண்டு பிரார்த்தனை நடைபெற்றது. இதேபோல் தெற்கு பஜாரில் உள்ள சவேரியார் பேராலயத்தில் பிஷப் அந்தோணிசாமி, பங்கு தந்தை ராஜேஷ் ஆகியோர் தலைமையிலும் புத்தாண்டு பிரார்த்தனையும், சிறப்பு திருப்பலியும் நடைபெற்றது.

பாளையங்கோட்டை ஊசி கோபுரம் சி.எஸ்.ஐ. கதிட்ரல் ஆலயம் உள்ளிட்ட அனைத்து சி.எஸ்.ஐ. ஆலயங்களிலும் நள்ளிரவில் புத்தாண்டு சிறப்பு ஆராதனையும், அதிகாலையில் நற்கருணை ஆராதனையும் நடந்தது. புத்தாண்டையொட்டி நெல்லை மாநகரம் முழுவதும் முக்கிய சந்திப்புகளில் போலீசார் பலத்த பாதுகாப்பு பணியில் ஈடுபட்டிருந்தனர்.

இதேபோல் நெல்லை, தென்காசி மாவட்டங்களில் கிறிஸ்தவ ஆலயங்களில் புத்தாண்டு சிறப்பு பிரார்த்தனை நடைபெற்றது.