சென்னையில் மின்சார பில்லர் பெட்டிகள் ஒரு மீட்டர் உயர்த்தும் பணி - அமைச்சர் செந்தில்பாலாஜி தகவல்

சென்னை,

சென்னையில் நேற்று முன்தினம் பெய்த கன மழையால் பல்வேறு இடங்களில் மழைநீர் தேங்கியது. இதையடுத்து முன்னெச்சரிக்கை நடவடிக்கையாக சில பகுதிகளில் மின் இணைப்பு துண்டிக்கப்பட்டது.

இந்தநிலையில் மின்சாரம், மதுவிலக்கு மற்றும் ஆயத்தீர்வைத் துறை அமைச்சர் வி.செந்தில்பாலாஜி, தமிழ்நாடு மின் உற்பத்தி மற்றும் பகிர்மான கழக தலைமை அலுவலகத்தில் உள்ள மின் நுகர்வோர் குறைதீர்க்கும் மின்னகத்தில் நேற்று முன்தினம் இரவு ஆய்வு மேற்கொண்டார். அதனைத் தொடர்ந்து சென்னை மின் நுகர்வோர் கட்டுப்பாட்டு மையத்தையும் பார்வையிட்டார்.

பின்னர் அவர் நிருபர்களிடம் கூறியதாவது:-

சென்னையில் பெய்த அதி கனமழை காரணமாக 32 பகுதிகளில் மின் வினியோகம் நிறுத்தி வைக்கப்பட்டு, மின்சாரத்துறை, மாநகராட்சி நிர்வாகம் இணைந்து போர்க்கால அடிப்படையில் நடவடிக்கை மேற்கொள்ளப்பட்டு, 23 பகுதிகளில் மின் வினியோகம் மீண்டும் வழங்கப்பட்டது. மீதம் இருக்கும் பகுதிகளில் மின் வினியோகம் வழங்குவதற்காக அங்குள்ள மழைநீரை அகற்றுவதற்கான பணிகளை விரைந்து செய்து வருகிறோம்.

முதல்-அமைச்சரால் தொடங்கப்பட்ட மின்னகத்துக்கு இதுவரை 5 லட்சத்து 77 ஆயிரம் புகார்கள் வந்தன. அதில் 98 சதவீதம் தீர்வு காணப்பட்டு இருக்கிறது.

சென்னையில் 3 பேர் மின் விபத்தால் உயிரிழப்பு ஏற்பட்டுள்ளது பற்றி விரிவான ஆய்வுகள் செய்யப்பட்டு வருகின்றன.

கடந்த முறை வடகிழக்கு பருவமழையால் மழைநீர் சூழ்ந்து இருந்த பகுதிகளில் 1 மீட்டர் அளவுக்கு மின்சார பில்லர் பெட்டிகளை உயர்த்த வேண்டும் என்று முதல்-அமைச்சர் உத்தரவிட்டிருந்தார். அதற்கான பணிகளை கடந்த 23-ந்தேதி முதல் தொடங்கி இருக்கிறோம்.

அடுத்த மழைகாலம் வருவதற்குள் சென்னை மாநகராட்சி முழுவதுமாக அனைத்து மின்சார பில்லர் பெட்டிகளும் ஒரு மீட்டர் அளவுக்கு உயர்த்தப்பட்டு மாற்றி அமைக்கப்படும்.

அதனால் மழைநீர் சூழ்ந்தால் கூட சீரான மின் வினியோகம் வழங்கக்கூடிய அளவில் மின்சாரத்துறை அதற்கான நடவடிக்கைகளை முதல்-அமைச்சரின் வழிகாட்டுதலின்படி எடுத்து வருகிறது.

இவ்வாறு அவர் கூறினார்.