வேன் மோதி முதியவர் பலி

கோவில்பட்டி:

கோவில்பட்டியை அடுத்துள்ள புதுஅப்பனேரி வெங்கடேஸ்வரா கார்டன் பகுதியை சேர்ந்தவர் சித்தன் (வயது 76). இவர் சம்பவத்தன்று மோட்டார் சைக்கிளில் கோவில்பட்டிக்கு வந்தார். பின்னர் அங்கிருந்து வீட்டுக்கு மோட்டார் சைக்கிளில் சென்று கொண்டிருந்தார். இளையரனேந்தல் ரோட்டில் சென்றபோது எதிரே வந்த வேன் மோதியதில், மோட்டார் சைக்கிளில் இருந்து தூக்கி வீசப்பட்டு அவர் படுகாயம் அடைந்தார். அவரை அக்கம்பக்கத்தினர் மீட்டு கோவில்பட்டி அரசு மருத்துவமனைக்கு கொண்டு சென்றனர். பரிசோதனை செய்த டாக்டர், சித்தன் ஏற்கனவே இறந்து விட்டதாக தெரிவித்தார். 

இதுகுறித்து தகவல் அறிந்ததும் கோவில்பட்டி மேற்கு போலீஸ் இன்ஸ்பெக்டர் சபாபதி மருத்துவமனைக்கு சென்று அவரது உடலை கைப்பற்றி பிரேத பரிசோதனைக்கு அனுப்பி வைத்தார். இந்த விபத்து தொடர்பாக கோவில்பட்டி மேற்கு போலீசார் வழக்குப்பதிவு செய்து, வேன் டிரைவர் படந்தபுளியை சேர்ந்த சவுந்தரராஜை (24) கைது செய்தனர்.