எருமப்பட்டி அருகே தேர்வுக்கு பயந்து விஷம் குடித்த மாணவி சாவு

எருமப்பட்டி:

எருமப்பட்டி அருகே தேர்வுக்கு பயந்து விஷம் குடித்த மாணவி இறந்தார்.

நாமக்கல் மாவட்டம், எருமப்பட்டி அருகே உள்ள கஸ்தூரிபட்டியை சேர்ந்தவர் ஜெயபிரகாஷ், விவசாயி. இவருடைய மகள் காவியா (வயது 18). இவர் பிளஸ்-2 முடித்து விட்டு நாமக்கல்லில் உள்ள பயிற்சி நிலையத்தில் கூட்டுறவு மேலாண்மை பட்டயப்படிப்பு படித்து வந்தார். இந்த நிலையில் மாணவி காவியா சரிவர படிக்கவில்லை என்று கூறப்படுகிறது. இதனால் விரைவில் நடைபெற உள்ள தேர்வை தம்மால் சரியாக எழுதமுடியாது என்று கவலை அடைந்தார்.

இதனால் மன வேதனையுடன் காணப்பட்ட மாணவி காவியா புத்தாண்டு அன்று தற்கொலை செய்து கொள்ள முடிவு செய்துள்ளார். அன்று காலை தந்தை ஜெயபிரகாஷ், வரகூருக்கு சென்றுவிட்ட நிலையில், தாயாரும் தோட்டத்துக்கு சென்று விட்டார். 

இதையடுத்து வீட்டில் தனியாக இருந்த மாணவி காவியா, விஷத்தை குடித்து விட்டு மயங்கி கிடந்தார். இதனிடையே வீட்டுக்கு திரும்பி வந்த ஜெயபிரகாஷ், மகள் விஷம் குடித்து மயங்கி கிடப்பதை கண்டு அதிர்ச்சி அடைந்தார். உடனே அவரை மீட்டு நாமக்கல் அரசு ஆஸ்பத்திரியில் சிகிச்சைக்காக சேர்த்தனர். அங்கு சிகிச்சை பலனின்றி மாணவி காவியா நேற்று இறந்தார்.

இந்த சம்பவம் குறித்து எருமப்பட்டி போலீசார் வழக்குப்பதிவு செய்து விசாரணை நடத்தி வருகிறார்கள்.