ரெயிலில் கஞ்சா கடத்திய வடமாநில வாலிபர் கைது

சூரமங்கலம்:-

சேலம் வழியாக திருப்பூருக்கு ரெயிலில் கஞ்சா கடத்திய வடமாநில வாலிபரை போலீசார் கைது செய்தனர். அவரிடம் இருந்து 5 கிலோ கஞ்சா பறிமுதல் செய்யப்பட்டது.

சேலம் வழியாக கேரளாவுக்கு செல்லும் ரெயிலில் கஞ்சா கடத்தப்படுவதாக சேலம் ரெயில்வே போலீசாருக்கு தகவல் கிடைத்தது. அதன்பேரில் போலீசார் ரெயில்களில் சோதனை நடத்தினர். இந்த நிலையில் ஜார்க்கண்ட் மாநிலம் தன்பாத்தில் இருந்து கேரள மாநிலம் ஆலப்புழாவிற்கு சென்ற சிறப்பு ரெயில் (வண்டி எண் 13351) நேற்று அதிகாலை 3.15 மணிக்கு சேலம் ரெயில் நிலையத்துக்கு வந்தடைந்தது.

இதையடுத்து அந்த ரெயிலில் போலீஸ் சிறப்பு சப்-இன்ஸ்பெக்டர் பாலமுருகன் தலைமையில் போலீசார் சோதனை நடத்தினர். அப்போது பயணிகளின் உடைமைகள் தீவிரமாக சோதனை செய்யப்பட்டன. 

இதில் டி.1 முன்பதிவு பெட்டியில் சந்தேகமளிக்கும் வகையில் இருந்த வாலிபரின் பையை போலீசார் சோதனையிட்ட போது அதற்குள் கஞ்சா இருந்தது கண்டுபிடிக்கப்பட்டது.

இதையடுத்து போலீசார் அந்த வாலிபரை பிடித்து போலீஸ் நிலையத்துக்கு அழைத்து சென்று விசாரணை நடத்தினர். இதில் அவர் ஒடிசா மாநிலம் காளியாபாலி பகுதியை சேர்ந்த சுனில் ஹரிபால் (வயது 21) என்பதும், திருப்பூருக்கு கஞ்சாவை கடத்தி சென்றதும் தெரியவந்தது. இதையடுத்து அவரை போலீசார் கைது செய்தனர்.

மேலும் சுனில் ஹரிபாலிடம் இருந்து 5 கிலோ கஞ்சா பறிமுதல் செய்யப்பட்டது. கொரோனா பரிசோதனைக்கு பிறகு அவரை சிறையில் அடைக்க ரெயில்வே போலீசார் நடவடிக்கை எடுத்து வருகின்றனர்.