மொபட்டில் இருந்து நிலைதடுமாறி விழுந்த விவசாயி சாவு

பெரம்பலூர்:

பெரம்பலூர் மாவட்டம் எறையசமுத்திரம் அய்யலூர் ரோடு காட்டுக்கொட்டகையில் வசித்து வருபவர் பெரியசாமி (வயது 55). விவசாயியான இவர் நேற்று முன்தினம் காலை சிறுவாச்சூரில் உள்ள மருந்தகத்துக்கு மருந்து வாங்குவதற்காக மொபட்டில் சென்றார். சிறுவாச்சூர் பாலம் அருகே சென்றபோது மொபட்டில் இருந்து திடீரென்று நிலைதடுமாறி பெரியசாமி கீழே விழுந்ததில் படுகாயமடைந்தார். இதனை கண்ட அந்த வழியாக சென்றவர்கள் அவரை மீட்டு பெரம்பலூர் அரசு மருத்துவமனையில் சிகிச்சைக்காக சேர்த்தனர். பின்னர் மேல்சிகிச்சைக்காக திருச்சி அரசு மருத்துவமனையில் அனுமதிக்கப்பட்ட பெரியசாமி நேற்று காலை சிகிச்சை பலனின்றி பரிதாபமாக உயிரிழந்தார். இது தொடர்பாக பெரியசாமியின் மனைவி தனம் கொடுத்த புகாரின் பேரில், பெரம்பலூர் போலீசார் வழக்குப்பதிவு செய்து விசாரணை நடத்தி வருகின்றனர். இறந்துபோன பெரியசாமிக்கு 2 மகள்கள் உள்ளனர் என்பது குறிப்பிடத்தக்கது.