கன்டெய்னர் லாரி மீது மோட்டார் சைக்கிள் மோதியது 2 வயது குழந்தை தந்தை பரிதாப சாவு காவேரிப்பட்டணம் அருகே விபத்து

காவேரிப்பட்டணம்:

காவேரிப்பட்டணம் அருகே கன்டெய்னர் லாரி மீது மோட்டார்சைக்கிள் மோதிய விபத்தில், 2 வயது குழந்தை, தந்தை பரிதாபமாக இறந்தனர்.

இந்த விபத்து பற்றிய விவரம் வருமாறு:-

ஏ.டி.எம். மைய ஊழியர் 

கிருஷ்ணகிரி மாவட்டம் காவேரிப்பட்டணம் அருகே உள்ள ஊத்துப்பள்ளம் பகுதியை சேர்ந்தவர் சரவணன். இவரது மகன் பெரியசாமி (வயது 28). இவர் ஓசூரில் ஏ.டி.எம். எந்திரங்களில் பணம் வைக்கும் நிறுவனத்தில் ஊழியராக வேலை செய்து வந்தார். இவருடைய மனைவி ரோகிணி (25). இவர்களுக்கு மிதுன் (2) என்ற மகன் இருந்தான். இந்தநிலையில் நேற்று பெரியசாமி தனது மனைவி, குழந்தையை அழைத்து கொண்டு பையூர் அருகே உள்ள மாமனார் வீட்டுக்கு மோட்டார் சைக்கிளில் சென்றார். பின்னர் மாலை அவர் மனைவி மற்றும் குழந்தையுடன் காவேரிப்பட்டணம் நோக்கி திரும்பி கொண்டிருந்தார்.

தந்தை-மகன் பலி 

பையூர் பஸ் நிறுத்தம் அருகில் தர்மபுரி-கிருஷ்ணகிரி தேசிய நெடுஞ்சாலையில் அவர்கள் வந்து கொண்டிருந்த போது, சாலையோரம் நிறுத்தப்பட்டிருந்த கன்டெய்னர் லாரி மீது மோட்டார்சைக்கிள் மோதியது. இந்த விபத்தில் மோட்டார்சைக்கிளை ஓட்டிச் சென்ற பெரியசாமியும், முன்னால் அமர்ந்திருந்த குழந்தை மிதுனும் சம்பவ இடத்திலேயே பலியானார்கள். ரோகிணி படுகாயம் அடைந்தார். 

இந்த விபத்து குறித்து தகவல் அறிந்ததும் காவேரிப்பட்டணம் போலீஸ் இன்ஸ்பெக்டர் முரளி மற்றும் போலீசார் சம்பவ இடத்திற்கு விரைந்து சென்றனர். அவர்கள் காயம் அடைந்த ரோகிணியை மீட்டு சிகிச்சைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர். 

மேலும் விபத்தில் பலியான பெரியசாமி, அவரது குழந்தை மிதுன் ஆகிய 2 பேரின் உடல்களை மீட்டு பிரேத பரிசோதனைக்காக காவேரிப்பட்டணம் அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து காவேரிப்பட்டணம் போலீசார் வழக்குப்பதிவு செய்து விசாரணை நடத்தி வருகின்றனர். விபத்தில் 2 வயது குழந்தையும், அவரது தந்தையும் பலியான சம்பவம் அந்த பகுதியில் சோகத்தை ஏற்படுத்தி உள்ளது.