‘தினத்தந்தி’ புகார் பெட்டி: மக்கள் குறைகள் தொடர்பான பதிவுகள்

செங்கல்பட்டு மாவட்டம் வண்டலூர் தாலுகா கன்னிவாக்கம் கிராமத்தில் உள்ள மின்கம்பம் ஆபத்தான நிலையில் இருப்பது குறித்து ‘தினத்தந்தி’ புகார் பெட்டியில் படத்துடன் செய்தி வெளியானது. இதையடுத்து ஆபத்தான மின்கம்பம் மாற்றப்பட்டு உள்ளது. இதனால் கிராம மக்கள் மகிழ்ச்சி அடைந்தாலும், அந்த கம்பத்தில் இருந்த மின்விளக்கு அகற்றப்பட்டு உள்ளதால் வருத்தமும் அடைந்துள்ளனர். எனவே மீண்டும் மின்விளக்கு பொருத்தப்படுமா?.

சென்னை பள்ளிக்கரணை அரசு மேல்நிலைப்பள்ளி அருகில் அமைந்துள்ள பஸ் நிறுத்த பயணிகள் நிழற்குடை மேற்கூரையின்றி உள்ளது. மேலும் அதன் எதிரே உள்ள பஸ் நிறுத்தத்தில் நிழற்குடையே இல்லை. இதனால் மாணவர்களும், பயணிகளும் சிரமம் அடைகின்றனர். எனவே சம்பந்தப்பட்ட அதிகாரிகள் உரிய நடவடிக்கை எடுக்க வேண்டும்.

-சமூக ஆர்வலர் கமலகண்ணன்.

சென்னை மாதவரம் பால்பண்ணையில் அமைந்துள்ள ஆவின் சிறுவர் விளையாட்டு பூங்காவில் உள்ள அனைத்து விளையாட்டு உபகரணங்களும் சேதம் அடைந்துள்ளது. இதனால் குழந்தைகளால் உற்சாகமாக விளையாட முடியவில்லை. எனவே சேதமடைந்த உபகரணங்களை மாற்றம் செய்து குழந்தைகள் மீண்டும் குதூகலத்துடன் விளையாடுவதற்கு ஏற்பாடு செய்ய வேண்டும்.

- ஆர்.லேவி, மாதவரம்.