தூத்துக்குடியில் அரசு பஸ் மீது கல் வீச்சு; 2 பேர் கைது

தூத்துக்குடி:

மதுரையில் இருந்து நேற்று முன்தினம் இரவு திருச்செந்தூருக்கு அரசு பஸ் ஒன்று புறப்பட்டு வந்து கொண்டிருந்தது. தூத்துக்குடி பெரியசாமி நகர் மேம்பாலம் அருகே வந்தபோது அங்கு மதுபோதையில் தகராறு செய்து கொண்டிருந்த 2 பேர் திடீரென பஸ் மீது கல் வீசி தாக்கிவிட்டு அங்கிருந்து தப்பிச் சென்றனர். இதில் பஸ்சின் முன்பக்க கண்ணாடி உடைந்தது. இதுகுறித்து பஸ் டிரைவர் செல்வராஜ், தூத்துக்குடி தென்பாகம் போலீசில் புகார் செய்தார்.

அதன் பேரில் இன்ஸ்பெக்டர் ஆனந்தராஜா வழக்குப்பதிவு செய்து விசாரணை நடத்தினார். விசாரணையில், பெரியசாமி நகர் மேம்பாலம் பகுதியைச் சேர்ந்த கோபிகண்ணன் (வயது 20) மற்றும் அரவிந்த் (20) ஆகியோர் பஸ் கண்ணாடியை உடைத்தது தெரியவந்தது. இதையடுத்து 2 பேரையும் போலீசார் கைது செய்து விசாரணை நடத்தி வருகின்றனர்.